246. Guardians Of The Galaxy Vol. 2 (2017)

Guardians Of The Galaxy Vol. 2 (2017)

ഗാർഡിയൻസ് ഓഫ് ദി ഗാലക്‌സി വോള്യം 2 (2017)

Language : English
Genre : Action | Adventure | Comedy | Sci-Fi
Director : James Gunn
IMDB : 8.2

Guardians Of The Galaxy Vol. 2 Theatrical Trailer

മൂന്നു വർഷം മുൻപ് മാർവലിൻറെ ഗാർഡിയൻസ് തീയറ്ററിൽ ഇറങ്ങുമ്പോൾ വെറും ട്രെയിലർ കണ്ടിട്ടുള്ള പ്രതീക്ഷ വെച്ച് മാത്രം തീയറ്ററിൽ കയറിയതാണ്. പ്രതീക്ഷകളറ്റ എനിക്ക് സിനിമ തന്നത് ഒരു പ്രത്യേക സന്തോഷവും ഉന്മേഷവും ആയിരുന്നു. ഒരു ലാഗുമില്ലാതെ മുഴുനീള സിനിമ എന്നങ്ങു ആസ്വദിച്ചു കണ്ടു. അന്ന് ഗ്രൂട്ട് ഇല്ലാണ്ടായപ്പോൾ റോക്കറ്റിൻറെ കൂട്ട് നഷ്ടപ്പെട്ടുവല്ലോ എന്നോർത്തു വിഷമിക്കുകയും ചെയ്തു. എന്നാൽ പുതുനാമ്പു വന്നത് കാണിച്ചു ആ സങ്കടം പെട്ടെന്ന് തന്നെ ഇല്ലാതാക്കി. 

രണ്ടാം ഭാഗം തുടങ്ങുന്നത് അയേഷാ എന്ന രാജ്ഞിയുടെ ലോകത്തെ വിശിഷ്ട ബാറ്ററികൾ മോഷ്ടിക്കാൻ വരുന്ന അന്യഗ്രഹജീവിയെ വക വരുത്തി ഗൊമോറയുടെ സഹോദരിയായ നെബുലയെ മോചിപ്പിക്കുക എന്നുദ്ദേശത്തോടെ നിൽക്കുന്ന ഗാർഡിയൻസിനെയുമാണ്.  അപ്പോഴാണ് കുഞ്ഞു ഗ്രൂട്ടിനെ സ്‌ക്രീനിൽ കാണിക്കുന്നത്. പിന്നണിയിൽ പൊരിഞ്ഞ യുദ്ധം നടക്കുമ്പോഴും നൃത്തം ചെയ്തു നടക്കുന്ന ഗ്രൂട്ടിൻറെ മേൽ നിന്നും നമുക്ക് കണ്ണെടുക്കാൻ കഴിയുകയില്ല. യുദ്ധത്തിന് ശേഷം റോക്കറ്റ് ആ ബാറ്ററിയിൽ ചിലതു മോഷ്ടിക്കുകയും ചെയ്യുന്നത് മൂലം ആയേഷാ രാജ്ഞിയുടെ കോപത്തിന് ഗാർഡിയൻസ് പാത്രമാകുന്നു. ആ യുദ്ധത്തിനിടയ്ക്ക് ക്വിലിൻറെ അച്ഛനായ ഈഗോ അവരുടെ രക്ഷയ്ക്കെത്തുന്നു. യുദ്ധത്തിനവസാനം ക്വിലാലിനെയും കൂട്ടരെയും ഈഗോ അയാളുടെ ഗ്രഹത്തിലേക്കു ക്ഷണിക്കുന്നു. അവിടെ പല രഹസ്യങ്ങളുടെയും ചുരുളഴിയുകയും ഒരിക്കൽ കൂടി ഗാർഡിയൻസ് പ്രപഞ്ചത്തിൻറെ രക്ഷകർ ആകുകയാണ്.

ഇത്തവണയും രക്ഷകരുടെ കഥയാണെങ്കിലും (സൂപ്പർ ഹീറോ ചിത്രങ്ങളുടെ പ്രധാന അജണ്ട അതാണല്ലോ) വളരെ മികച്ച രീതിയിൽ കഥ പറയുവാൻ ശ്രമിച്ചിട്ടുണ്ട്. VFX മികച്ചു നിന്നു, കഥാപാത്രങ്ങളെ വ്യക്തമായി തന്നെ രേഖപ്പെടുത്തിയിട്ടുണ്ട്. കഥാഖ്യാനം ആദ്യ ഭാഗം പോലെ തന്നെ വളരെ വേഗതയാര്ജിച്ച ഒന്ന് തന്നെയായിരുന്നു. ആക്ഷനും കോമഡിയും ഒരു പടി കൂടി മേലെ തന്നെയായിരുന്നു. ചിരിക്കാനുള്ള വക എല്ലാവരും സംഭാവന ചെയ്തിട്ടുണ്ട്. പ്രത്യേകിച്ച് റോക്കറ്റ് - ഗ്രൂട്ട് - ഡ്രാക്സ് ടീം. ഗ്രൂട്ട് സ്‌ക്രീനിൽ വന്നു കഴിഞ്ഞാൽ വേറൊന്നും കാണാൻ തോന്നില്ല. അത്രയ്ക്ക് ക്യൂട്ട് ആയിരുന്നു ബേബി ഗ്രൂട്ട്. ശരിക്കും നമുക്ക് ഗ്രൂട്ടിനെ ഇഷ്ടപ്പെട്ടു പോകും. പശ്ചാത്തല സംഗീതം നിർവഹിച്ച ടൈലർ ബെറ്റ്‌സ് പ്രത്യേക പ്രശംസ അർഹിക്കുന്നുണ്ട്.
നല്ല രീതിയിൽ തന്നെ കഥ മുൻപോട്ടു പ്രയാണം നടത്തിയെങ്കിലും മികച്ചൊരു വില്ലന്റെ അഭാവം ക്ളൈമാക്സിലെല്ലാം നിഴലിച്ചു. പ്രേക്ഷകനിൽ സ്വാധീനം ചെലുത്താൻ കഴിഞ്ഞില്ല എന്ന് തന്നെ പറയാം. എന്നിരുന്നാലും മൊത്തത്തിൽ ഒരു ആസ്വാദ്യകരമായ ചിത്രമായി മാറുകയും ചെയ്തു.

ക്രിസ് പ്രാറ്റ് തൻറെ ക്വിൽ അഥവാ സ്റ്റാർ-ലോർഡ് എന്ന കഥാപാത്രം മോശമാക്കിയില്ല. കോമഡിയിലും ആക്ഷനിലും സെന്റിമെൻറ്സിലും അദ്ദേഹം നന്നായി അവതരിപ്പിച്ചു.

ഗൊമോറയായി സോയി സൽടാനയും നെബുല ആയി കാരൻ ഗില്ല്യനും നല്ല പ്രകടനം കാഴ്ച വെച്ചു. ഡേവ് ബാറ്റിസ്റ്റ ഡ്രാക്സ് ആയി തകർപ്പൻ പ്രകടനം ആയിരുന്നു. കോമഡി ഒക്കെ അനായാസമായിട്ടാണ് കൈകാര്യം ചെയ്തത്.
ക്വില്ലിന്റെ അച്ഛനായ ഈഗോയെ അവതരിപ്പിച്ചത് കർട്ട് റസൽ ആയിരുന്നു. എഴുപതിനടുത്തു പ്രായം വരുന്ന കർട്ടിന്റെ ഗ്ളാമറിനൊരു കോട്ടം തട്ടിയിട്ടില്ലായെന്നു തോന്നിപ്പോകും. അഭിനയം മോശമല്ലായിരുന്നു.
റാക്കറ്റിനു ശബ്ദം കൊടുത്ത ബ്രാഡ്ലി കൂപ്പറും ബേബി ഗ്രൂട്ടിനു ശബ്ദം കൊടുത്ത വിൻ ഡീസലും തകർത്തു വാരി. യോണ്ടുവിനെ അവതരിപ്പിച്ച മൈക്കേൽ റൂക്കറിന് ഇത്തവണ അല്പം മികച്ച റോൾ ലഭിക്കുകയും അതദ്ദേഹം നല്ല രീതിയിൽ അവതരിപ്പിക്കുകയും ചെയ്തു.
സിൽവസ്റ്റർ സ്റ്റാലോൺ, വിങ് റെയിംസ്, മിഷേൽ യോ, ഡേവിഡ് ഹാസൽഹോഫ്, തുടങ്ങിയവർ കാമിയോ വേഷങ്ങളിൽ വന്നു പോവുകയും ചെയ്തു.

മൊട്ടത്തത്തിൽ എനിക്കൊത്തിരി ഇഷ്ടപ്പെട്ട ചിത്രമായി മാറി ഗാർഡിയൻസ് 2, ഒന്നാം ഭാഗത്തിന്റെ അത്രയും എത്തിയോ എന്ന് ചോദിച്ചാൽ, എത്തിയില്ലെങ്കിലും, രണ്ടേകാൽ മണിക്കൂർ ജീവിതത്തിൻറെ വ്യഥകളൊന്നും ആലോചിക്കാനുള്ള സമയം തരാത്ത ഒരു അടിപൊളി ചിത്രം. തീയറ്ററിൽ നിന്നും കാണുവാൻ ശ്രമിക്കുക.

എൻറെ റേറ്റിങ് 9 ഓൺ 10 (എട്ടാണ് കൊടുക്കാൻ ഉദ്ദേശിച്ചത്, കുട്ടി ഗ്രൂട്ടിനു ഞാൻ ഒരു മാർക് കൂടി കൂടുതൽ കൊടുക്കുന്നു.. LOVE YOU GROOT)

245. The Hurt Locker (2008)

ദി ഹർട്ട് ലോക്കർ (2008)

Language : English
Genre : Drama | War
Director : Katheryn Begalow
IMDB : 7.8

The Hurt Locker Theatrical Trailer

ഞാൻ സെർജെന്റ്  JT സാൻബോൺ, ഇപ്പോൾ ഇറാഖിൽ US Army Explosive Ordnance Disposal അഥവാ EOD ടീമിൽ ജോലി ചെയ്യുന്നു. ബോംബുകൾ കണ്ടെടുക്കുമ്പോൾ നിർവീര്യമാക്കുന്ന വളരെ വിഷമകരമായ ജോലിയാണ് ചെയ്യേണ്ടുന്നത്. ഈ മരണമണി മുഴക്കുന്ന ജോലിയിൽ തീരെ താല്പര്യമില്ല, വീട്ടിലേക്കു തിരിച്ചു പോകുന്ന നാൾ കാത്തു കഴിയുകയാണ്. അതിനിടെയിൽ ആണ്, എന്റെ ടീമിന്റെ സ്റ്റാഫ് സെർജെന്റ് മാത്ത്യു തോംപ്സൺ ബോംബ് നിർവീര്യമാക്കുന്ന ശ്രമത്തിനിടയിൽ കൊല്ലപ്പെടുന്നത്. കണ്മുന്നിൽ നടന്ന ഈ സംഭവത്തിൽ നിന്നും മുക്തമാകാൻ എനിക്കും എന്റെ പങ്കാളി ഓവനും കഴിഞ്ഞില്ല എന്നത് ആണ് വികൃതമായ സത്യം. മാത്യുവിന് പകരമായി സ്പെഷ്യലിസ്റ് ആയി വന്നതാണ് വിൽ എന്ന് വിളിക്കുന്ന വില്യം ജെയിംസ്.
അയാളുടെ നിലപാടുകളും സാഹസികതയും ഫീൽഡിലെ ഇടപെടലുകളും  അതീവ അപകടകരമാം വിധത്തിൽ ആണ്. പ്രോട്ടോകോൾക്കെതിരായ ചെയ്തികൾ ആണ് ചെയ്തു കൂട്ടുന്നത്. അദ്ദേഹത്തിൻറെ ഈ ഒരു ക്രിയ കാരണം എനിക്കെന്റെ വീട്ടിലേക്കു ജീവനോടെ തിരിച്ചു പോകാൻ കഴിയുമോയെന്ന് അറിയില്ല.

ഇപ്പോൾ നിങ്ങൾ വിചാരിക്കും ഇതെന്റെ കഥയാണെന്ന്. ഇതെന്റെ കഥയല്ല, ഞാൻ അല്ല ഈ കഥയിലെ നായകൻ. അത് വില്യമാണ്.

2008ലെ മികച്ച ചിത്രത്തിനുള്ള ഓസ്കാർ അവാർഡും മികച്ച സംവിധായികയ്ക്കുള്ള ഓസ്കാർ അവാർഡും ഉൾപ്പടെ ആറു അക്കാദമി അവാർഡ് നേടിയ ചിത്രത്തിനെ പറ്റിയാണ് വിവരിച്ചത്. ക്രിസ് ഹെഡ്ജസ് എഴുതിയ War is a Force that Gives Us Meaning എന്ന കാതറീൻ ബിഗാലോ സംവിധാനം ചെയ്തിരിക്കുന്നത്. ഒരു യുദ്ധഭൂമിയിൽ എന്താണ് നടക്കുന്നതെന്നു നമ്മുടെ കണ്മുന്നിൽ കാണുന്നതു പോലെയാണ് കാതറിൻ ഈ ചിത്രം അണിയിച്ചൊരുക്കിയിരിക്കുന്നത്. അൽപം മെല്ലെയാണ് കഥയുടെ ആഖ്യാനമെങ്കിലും ഓരോ നിമിഷവും ഉദ്യോഗജനകവുമായാണ് ചിത്രം അരങ്ങേറുന്നത്. കഥാപാത്രങ്ങളുടെ പ്രകടനവും ഒന്നിനൊന്നു മെച്ചം.  എടുത്തു പറയേണ്ട ഒന്നു ചിത്രത്തിൻറെ  ക്യമാറ ചലിപ്പിച്ച ബാരി ആര്കറോയ്ഡിന്റെ കരവിരുതാണ്. ഒരു യുദ്ധഭൂമിയുടെ ഒറിജിനാലിറ്റി ക്യാമറയിലൂടെ പകർന്നു നൽകി. അതിനു ചേരുന്ന രീതിയിൽ പശ്ചാത്തല സംഗീതം മാർകോ ബെൽട്രാമിയും ബക് സാൻഡർസും നൽകി. ചിത്രത്തിൻറെ മൂട് നില നിർത്തുന്നതിൽ അവർ വഹിച്ച പങ്കു വളരെ വലുത് തന്നെയായിരുന്നു.മികച്ച എഡിറ്റിങ് ആയിരുന്നു മറ്റൊരു ആകർഷക ഘടകം.

ജെറമി റെന്നെറും ആന്തണി മാക്കിയും ആണ് പ്രധാന കഥാപാത്രങ്ങളെ അവതരിപ്പിച്ചതു വളരെ മികച്ച രീതിയിൽ ആയിരുന്നു. ജെറമി ഒരു പിടി മുന്നിൽ നിന്നു.  രാജ്യത്തിനു വേണ്ടി മരുഭൂമിയിൽ വെയിലും മഴയും കൊണ്ട് കഷ്ടപ്പെടുന്ന ഓരോ പട്ടാളക്കാരുടെയും പ്രതിനിധികൾ ആയിരുന്നു അവർ. തുടർച്ചയായ ഈ യുദ്ധഭൂമിയിലെ ജീവിതത്തിൽ നിന്നും കിട്ടുന്ന Stress അവരുടെ മാനസിക നിലയെ ചൂഷണം ചെയ്യുന്നതൊക്കെ വ്യക്തമായി വരച്ചു കാട്ടിയിട്ടുണ്ട്. ബ്രയാൻ ഗെറാഘട്ടി അവതരിപ്പിച്ച ഓവനും പ്രത്യേക പരാമർശം അർഹിക്കുന്നു. യുദ്ധം തീരെ താല്പര്യമില്ലാത്ത ഒരു പട്ടാളക്കാരൻ അദ്ദേഹത്തിൻറെ കഥാപാത്രം. റാൾഫ് ഫിയെൻസ്, ഗയ് പിയേഴ്സ്, ഡേവിഡ് മോർസേ തുടങ്ങിയ പ്രഗത്ഭർ ചെറിയ റോളുകൾ ആണെങ്കിലും നന്നായി തന്നെ ചെയ്തു,

ഒൻപതു വിഭാഗങ്ങളിൽ നോമിനേഷൻ നേടുകയും, അതിൽ ആര് പുരസ്കാരങ്ങൾ അക്കാദമി നിശയിൽ നേടിയ ചിത്രമാണ് ദി ഹർട്ട് ലോക്കർ. ഏറ്റവും മികച്ച ചിത്രം, മികച്ച സംവിധായിക, മികച്ച തിരക്കഥ, മികച്ച എഡിറ്റിങ്, മികച്ച സൗണ്ട് മിക്സിങ്, മികച്ച സൗണ്ട് എഡിറ്റിങ് എന്നീ വിഭാഗത്തിൽ ആണ് പുരസ്കാരങ്ങൾ ലഭിച്ചത്.

കുറച്ചു ലൂപ്പ്ഹോൾസും ലോജിക്കില്ലായ്മ ഉണ്ടെങ്കിലും നഖങ്ങൾ കടിച്ചു തീർക്കാനുതകുന്ന ഒരു എഡ്ജ് ഓഫ് ദി സീറ്റ് ത്രില്ലെർ ആണ് ഈ ചിത്രം. ത്രില്ലർ ജോൻറെകൾ ഇഷ്ടമുള്ളവർക്ക് ധൈര്യമായി കാണാവുന്നതാണ്.

എൻറെ റേറ്റിംഗ് 8.3 ഓൺ 10

244. Bahubali 2 : The Conclusion (2017)

ബാഹുബലി 2 : ദി കൺക്ലൂഷൻ (2017)

Language : Tamil
Genre : Action | Fiction | Drama | Romance | War
Director : S.S. Rajamouli
IMDB :

Bahubali 2 : The Conclusion Theatrical Trailer

ആദ്യമേ ബാഹുബലി രണ്ടാം ഭാഗം റിലീസ് ആകുമ്പോൾ എൻറെ മനസ്സിൽ പ്രത്യേകിച്ച് ആവേശം ഒന്നും നൽകിയിരുന്നില്ല. കൊട്ടിഘോഷിച്ച ആദ്യ ഭാഗം അത്ര കണ്ടു തൃപ്തി നൽകിയിരുന്നില്ല എന്നത് തന്നെ കാരണം. ആരവങ്ങളെല്ലാം അടങ്ങിയതിനു ശേഷം തീയറ്ററിൽ പോയി കാണാം എന്ന് കരുതിയിരുന്ന ഞാൻ വീട്ടിലെത്തിയപ്പോൾ ടിക്കറ്റും എടുത്തു കാത്തിരുന്ന സുഹൃത്തുക്കളെയാണ്. അവർ എടുത്തത് തമിഴ് ഭാഷയിലെ റിലീസിനുമാണ്. അപ്പോഴും കാണാൻ താല്പര്യമില്ലായിരുന്നു. കാരണം, ഏതു സിനിമ കാണുമ്പോഴും അതിൻറെതായ  ഭാഷയിൽ കാണുവാൻ ആണ് എപ്പോഴും താത്പര്യം.  ശരി, ടിക്കറ്റു എടുത്തത് കളയണ്ട എന്ന്  മനസില്ലാമനസോടെ തീയേറ്ററിലേക്ക് പോയി.  അർദ്ധരാത്രി പന്ത്രണ്ടു മണിക്കായിരുന്നു ഷോ.

ആദ്യ ഭാഗം നിർത്തിയെടത്തും നിന്ന് തന്നെയാണ് ഈ ചിത്രം തുടങ്ങുന്നത്. ഈ ചിത്രത്തില്‍ അമരേന്ദ്ര ബാഹുബലിയുടെയും ദേവസേനയുടെയും കഥയാണ് പറയുന്നത്. അവര്‍ തമ്മില്‍ കണ്ടുമുട്ടുന്നതും വിവാഹം ചെയ്യുന്നതും, മഹേന്ദ്ര ബാഹുബലിയുടെ ജനനവും, കട്ടപ്പയും ബാഹുബലിയും തമ്മിലുള്ള സുഹൃദ് ബന്ധവും, ഭല്ലയ്ക്ക് കിരീടത്തിനു മേലുള്ള അടങ്ങാത്ത ആഗ്രഹവും ഒക്കെ ആണ് ചിത്രത്തിലൂടെ പറയുന്നത്.

വളരെ മികച്ച രീതിയിലൂടെ ആണ് ടൈറ്റില്‍ കാര്‍ഡ്സ് അവതരിപ്പിച്ചത്. ഒരു പുതുമ ഉണ്ടായിരുന്നു അത് കാണുവാന്‍. ആദ്യ പകുതി വളരെ മികച്ച രീതിയില്‍ അവതരിപ്പിച്ചു. സത്യം പറഞ്ഞാല്‍, ബാഹുബലി എന്ന ചിത്രം മികച്ചതെന്നു അഭിപ്രായമില്ലാത്ത എന്റെ മനസ് നിറയ്ക്കും വിധം ആയിരുന്നു അവതരണം. ഒരു perfect ഫിനാലെ ആകും എന്ന പ്രതീക്ഷ മനസിന്‌ തന്നിരുന്നു. മികച്ച ആക്ഷന്‍ സീനുകളും, മാസ് സീനുകളും, നല്ല കോമഡിയും, ഗാനങ്ങളും നിറഞ്ഞ ഒരു മികച്ച ചിത്രം ആകുമെന്ന പ്രതീക്ഷ കൂട്ടിക്കൊണ്ടെയിരുന്നു. ഇന്‍റര്‍വെല്‍ ബ്ലോക്ക് രോമാഞ്ചം ഉണ്ടാക്കുന്ന തരത്തിലുമായിരുന്നു. ഒരു തരത്തില്‍ പറഞ്ഞാല്‍ കിടിലന്‍ ആദ്യ പകുതി. 

രണ്ടാം പകുതിയും വളരെ മികച്ച രീതിയില്‍ ആരംഭിച്ചു ദേവസേനയുടെയും അമരേന്ദ്ര ബാഹുബലിയുടെയും രണ്ടു മൂന്നു മാസ് സീനുകളിലൂടെ കടന്നു പോയി. മികച്ച രീതിയില്‍ മുന്‍പോട്ടു കൊണ്ട് പോയി. ക്ലൈമാക്സ് സീനിനു തൊട്ടു മുന്‍പുള്ള സീന്‍ വരെ മികച്ചു നിന്നെങ്കിലും. പിന്നീട് അത്രയും വരെ കൊണ്ട് വന്ന സംവിധാന കയ്യടക്കം കൈമോശം രാജമൌലിയ്ക്ക് നഷ്ടപ്പെട്ടതായി തോന്നി. അത്രയ്ക്കും മോശമായ ഒരു ക്ലൈമാക്സ് സീനുകളും ക്ലോസിംഗ് സീനുകളും. മൂക്കത്ത് വിരല്‍ വെച്ചു പോകുന്ന സീനുകളുടെ (അതിശയം മൂലമല്ല എന്നും ഓര്‍ക്കണം) അരങ്ങേറ്റം ആണ് പിന്നീട് കാണാന്‍ കഴിയുന്നത്‌. മിഴുനീള മികച്ച സിനിമയുടെ വീര്യം അത്രയും നശിപ്പിക്കുന്ന അരോജകവും തലക്ക് കൈ വെച്ചിരുന്ന പോകുന്ന തട്ടിക്കൂട്ട് സീനുകള്‍ കൊണ്ട് കുത്തി നിറച്ചു.

അനുഷ്കയുടെ പ്രകടനം എടുത്തു പറയേണ്ട ഒന്നാണ്. അഴകെന്നു വെച്ചാല്‍ അവര്‍ സ്ക്രീനില്‍ വന്നാല്‍ കണ്ണെടുക്കാന്‍ തോന്നില്ല. അഴകില്‍ മാത്രമല്ല അവരുടെ അഭിനയവും മികച്ചു നിന്നു. അവസരത്തിനൊത്തുയര്‍ന്നു നില്‍ക്കുന്ന പ്രകടനം. ഒരു പക്ഷെ  ഇവര്‍ തന്നെയാകും ഈ ചിത്രത്തിന്‍റെ ഹൈലൈറ്റ് എന്ന് പറയാം.  

അമരേന്ദ്ര ബാഹുബലിയെ അവതരിപ്പിച്ച പ്രഭാസ് നല്ല രീതിയില്‍ തന്നെ ചെയ്തു. നല്ല സ്ക്രീന്‍പ്രസന്‍സും മിതത്വവും എന്നാല്‍ അവസരത്തിനൊത്ത പ്രകടനം ആയിരുന്നു. ആക്ഷനിലും എല്ലാം മികച്ചു നിന്നു. പക്ഷെ ഓവര്‍ ആക്ടിങ്ങിലൂടെ മഹേന്ദ്ര ബാഹുബലിയെന്ന കഥാപാത്രത്തിന്റെ അവതരണം മോശമാക്കി മാറ്റുകയും ചെയ്തു. സംവിധായകന്‍ പറയുന്നതല്ലേ നടന്‍ അവതരിപ്പിക്കുകയുള്ളൂ.

കട്ടപ്പ എന്നാ കഥാപാത്രം അവതരിപ്പിക്കാന്‍ താന്‍ തന്നെയാണ് ഉചിതന്‍ എന്നുറപ്പിച്ച സത്യരാജിന്റെ  പ്രകടനം. ഇടക്ക് പുളിമുരുഗനിലെ മൂപ്പന്‍ ആകാനും അദ്ദേഹം മറന്നില്ല. വികാരനിര്‍ഭരമായ സീനുകളില്‍ അദ്ദേഹത്തിന്‍റെ പ്രകടനം എടുത്തു പറയേണ്ടതോന്നാണ്. 

കുമാരവര്‍മ്മ എന്ന കഥാപാത്രം അവതരിപ്പിച്ച തെലുങ്ക്‌ സിനിമയിലെ വില്ലന്‍ കഥാപാത്രങ്ങളെ അവതരിപ്പിക്കാറുള്ള സുബ്ബരാജു കോമഡിയും ആക്ഷനുമായി മികച്ചു നിന്നു. പ്രേക്ഷകരെ ചിരിപ്പിക്കാനുള്ള മരുന്നും തന്‍റെ കയിലുണ്ടെന്നു തെളിയിച്ചു.

രമ്യാകൃഷ്ണന്‍ പ്രതീക്ഷയ്ക്ക് മങ്ങലേല്‍പ്പിക്കാത്തതരത്തിലുള്ള പ്രകടനം. ഈ പ്രായത്തിലും അവരുടെ മുഖത്തെ തേജസും കഥാപാത്രത്തെ അവതരിപ്പിക്കുമ്പോള്‍ മറ്റുള്ളവര്‍ക്ക് പകര്‍ന്നു കൊടുക്കുന്ന ഊര്‍ജവും ഇവിടെ എഴുതി പ്രതിഫലിപ്പിക്കാന്‍ കഴിയില്ല എന്നത് വാസ്തവം. ഒരു നോട്ടത്തിലുള്ള തീഷ്ണത.. i loved it.."എന്നാ വയസാനാലും ഉന്‍ അഴഗും സ്റ്റൈലും ഉന്നെ വിട്ടു പോഗലെ" എന്ന അവര്‍ തന്നെ പറഞ്ഞ സംഭാഷണ ശകലം ഞാന്‍ അവര്‍ക്കായി കടമെടുക്കുന്നു.

റാണാ ദാഗ്ഗുബാട്ടിക്കു പ്രത്യേകിച്ചൊന്നും ചെയ്യാനുണ്ടായിരുന്നില്ല ആദ്യ പകുതിയില്‍ എന്നാല്‍ രണ്ടാം പകുതിയില്‍ വില്ലനിസത്തിന്‍റെ ക്രൂരതയുടെ പര്യായം ആകാനും അത് നല്ല രീതിയില്‍ അവതരിപ്പിച്ചു വിജയിപ്പിക്കുകയും ചെയ്തു. അവിശ്വസനീയമെങ്കിലും ആക്ഷന്‍ സീനുകളിലും മികച്ചു നിന്നു.

ഏക ആശ്വാസം തമന്നയ്ക്ക് അധികം സ്ക്രീന്‍സ്പേസ് കൊടുത്തില്ലയെന്നതാണ്. എന്നാലും അഞ്ചു മിനുറ്റ് ഉള്ളതും നല്ല ബോറാക്കാനും അവര്‍ മറന്നില്ല. നാസര്‍,

ഇനി സിനിമയുടെ മറ്റു ഭാഗങ്ങളിലേക്ക് വന്നാല്‍, നമ്മള്‍ പണ്ട് ബാലരമയിലും അമര്‍ ചിത്രകഥകളിലും മറ്റും വായിച്ചു പരിചയിച്ച ഒരു കഥ തന്നെയാണ് ചിത്രത്തിനുള്ളത്. രാജാവും, മന്ത്രിയും, പരിചാരകരും, സേനാപതിയും ഒക്കെ ഉള്ള ഒരു നാടന്‍ രാജാവിന്റെ കഥ. അതിത്രയും വലിയ കാന്‍വാസില്‍ അവതരിപ്പിച്ച രാജമൌലി എന്നാ സംവിധായകന് നമോവാകം. ആദ്യ ബാഹുബലി സിനിമയില്‍ നിന്നും വിഎഫ്എക്സ്, അവതരണം എന്നാ നിലയില്‍ ഈ ചിത്രം മികച്ചു  നിന്ന് നിസംശയം പറയാം. വളരെ മികച്ചു നിന്ന  വിഎഫ്എക്സ് സീനുകള്‍ ആണ്. 90 ശതമാനവും നന്നായി എന്ന് പറയാം. യാഥാര്‍ത്ഥ്യം ആണെന്ന് തോന്നിപ്പോകുന്ന സീനുകള്‍ പ്രത്യേകിച്ചും മൃഗങ്ങളെ അവതരിപ്പിച്ചതും ഒക്കെ. നല്ല അവതരണം ആണ് ചിത്രത്തിന്‍റെ ഹൈലൈറ്റ്. 

പ്രണയവും, തമാശയും, പാട്ടുകളും, കോപവും, വൈരവും, സങ്കടങ്ങളും എല്ലാം സമാസമം ചാലിച്ചെടുത്ത ചിത്രം. ആദ്യ ചിത്രത്തിനേക്കാള്‍ കൂടുതല്‍ വൈകാരികഭാവം ഈ ചിത്രത്തിന് കൂടുതല്‍ ആണ്. കഥാപാത്രങ്ങള്‍ക്കുണ്ടാകുന്ന മാനസിക പിരിമുറുക്കങ്ങള്‍ വളരെ മികച്ച രീതിയില്‍ അവതരിക്കപ്പെട്ടു. കലാകാരന്മാര്‍ സംവിധായകന്‍ ഉദ്ദേശിച്ചതിനു മേല്‍ കൊടുത്തിട്ടുണ്ടെന്ന് തന്നെയാണെന്നാണ് എന്റെ അഭിപ്രായം. 

സംഗീതം കൈകാര്യം ചെയ്ത എം.എം. കീരവാണി  ചിത്രത്തിനൊരു മുതല്‍കൂട്ട് തന്നെയാണ്. സിരകളെ ത്രസിപ്പിക്കുന്ന സംഗീതവും പാട്ടുകളും. ഒട്ടും ബോറടിപ്പിക്കുകയില്ല.

ഒരു ഐതിഹാസിക യുദ്ധം ഉണ്ടായിരുന്നില്ല ഈ ചിത്രത്തില്‍. ഉള്ളത് നല്ല ബോറായി അവതരിപ്പിക്കുകയും ചെയ്തു.

കെ കെ സെന്തില്‍കുമാര്‍ കൈകാര്യം ചെയ്ത ക്യാമറ നിലവാരം പുലര്‍ത്തിയിരുന്നില്ല.. ഒരു ശരാശരി നിലവാരം മാത്രമേ ഉണ്ടായിരുന്നുള്ളൂ. കുറച്ചു കൂടി നല്ല രീതിയില്‍ കൈകാര്യം ചെയ്തിരുന്നെങ്കില്‍ വേറെ ഒരു ലെവലില്‍ ചെന്നെനെ ഈ ചിത്രം.

പ്രത്യേകിച്ച് ട്വിസ്ടുകളോ സസ്പന്‍സോ ഒന്നും ചിത്രത്തിലില്ല എന്ന് പറഞ്ഞു കൊള്ളുന്നു. തീര്‍ത്തും predictable ആയിട്ട് തന്നെയാണ് കഥ മുന്‍പോട്ടു പോകുന്നു. അതില്‍ നിന്നും അണുവിട സംവിധായകന്‍ വ്യതി ചലിക്കുന്നുമില്ല. ക്ലീഷേകളുടെ ഒരു കൂമ്പാരം തന്നെ ഉണ്ട് താനും.

ലോജിക്കിലായ്മയും കണ്ടിന്യുറ്റി തെറ്റുകള്‍ നിരവധി ഉണ്ടായിരുന്നു ചിത്രത്തില്‍. ചിലപ്പോഴൊക്കെ രാജമൌലി ഇതിനൊന്നും അത്ര പ്രാധാന്യം കൊടുത്തിരുന്നില്ലെ എന്ന് നമ്മോടു തന്നെ ചോദിച്ചു പോകും. ഒരു സിനിമ ചെയ്യുമ്പോള്‍ അതിപ്പോള്‍ ഫിക്ഷനോ യാതാര്ത്യവുമായിക്കോട്ടേ, വിശ്വാസയോഗ്യമായി അവതരിപ്പിക്കുന്നതിലാണ് ഒരു സംവിധായകന്റെ വിജയം. ഒരു പ്രേക്ഷകന്‍ എപ്പോള്‍ അതിനു ചോദ്യം ചെയ്യുമ്പോള്‍ തന്നെ ആ സംവിധായകന്റെ ക്രാഫ്റ്റ് നഷ്ടപ്പെടും എന്നതല്ലേ വാസ്തവം.

ഞാന്‍ തമിഴ് ആണ് കണ്ടതെന്ന് മേലെ പറഞ്ഞല്ലോ.. ലിപ് സിങ്കുകള്‍ ആസ്വാദനത്തിനു ഒരു തടയിടുന്നതായി തോന്നി. ആകെ സിങ്ക് ആയി തോന്നിയത് സത്യരാജ്, രമ്യ, നാസറിന്റെ സീനുകള്‍ ആണ്. അതൊരു കല്ലുകടി ആയി മാറുന്നുണ്ട് പല ഭാഗങ്ങളിലും.

മൊത്തത്തില്‍ പറഞ്ഞാല്‍ എനിക്ക് ആദ്യ ചിത്രത്തേക്കാളും ക്ലൈമാക്സിലെ കല്ലുകടി ഒഴിവാക്കിയാല്‍ ഒത്തിരി ഇഷ്ടപ്പെട്ട ചിത്രമാണ് ബാഹുബലി 2. ക്ലൈമാക്സ് ഒക്കെ മികച്ച രീതിയില്‍ അവതരിപ്പിച്ചിരുന്നെങ്കില്‍ എക്കാലവും പ്രേക്ഷകരുടെ മനസ്സില്‍ തങ്ങി നില്‍ക്കുന്ന ഒന്നാകുമായിരുന്നു. വേറെ ലെവലില്‍ പോകുമായിരുന്നു. 

എന്‍റെ റേറ്റിംഗ് 7.5 ഓണ്‍ 10

243. Kaatru Veliyidai (2017)

കാട്രു വെളിയിടൈ (2017)

Language : Tamil
Genre : Drama | Romance
Director : Mani Rathnam
IMDB : 6.8

Kaatru Veliyidai Theatrical Trailer

എയർഫോഴ്സിലെ ഒരു മികച്ച ഫൈറ്റർ ആണ് വരുൺ എന്ന ഞാൻ. വിസി എന്ന് എല്ലാവരും എന്നെ വിളിക്കും. ജീവിതത്തോട് യാതൊരു ഉത്തരവാദിത്തവുമില്ലാതെ ജീവിച്ച ഞാൻ ഒരു വലിയ അപകടത്തിൽ പെട്ട് ബോധം പോയി ആശുപത്രി കിടക്കയിൽ ആദ്യം കണ്ണ് തുറക്കുമ്പോൾ ആണ് വേനൽകാലത്തിലെ മഞ്ഞുതുള്ളി പോലെ സുന്ദരമായ അവളുടെ വദനം കാണുന്നത്. സ്വതവേ സ്വാർത്ഥനും പ്ലേബോയുമായ എനിക്ക് അവളോട് അനുരാഗം തോന്നി. രണ്ടു മൂന്നു തവണ അവളെ കണ്ടുമുട്ടിയപ്പോഴാണ് അവൾ എൻറെ മൺമറഞ്ഞ സുഹൃത്തായ രവി എബ്രഹാമിന്റെ സഹോദരി ആണെന്ന് മനസിലാക്കുന്നത്. അതെനിക്ക് കൂടുതൽ സന്തോഷം നൽകി. അവൾക്കെന്നെ ജീവനായിരുന്നു, പക്ഷെ എന്റെ പിടിവാശിയും ധാർഷ്ട്യവും ഞാൻ അവളെ സ്നേഹിക്കുന്നതിനേക്കാൾ കൂടുതൽ വരുതിയിൽ നിർത്താനാണ് ശ്രമിച്ചത്.എനിക്കവളോട് ഒത്തിരി ഇഷ്ടമാണ്, പക്ഷെ  എന്നാൽ അതിലുമുപരി ഞാൻ എന്നെയാണ് ഇഷ്ടപ്പെടുന്നത്. എനിക്കറിയാം, അവൾ  അര്ഹതപ്പെട്ടവളല്ല എന്ന്, പക്ഷെ ഇന്ന്  പാകിസ്ഥാനിലെ ഈ തടവറയിൽ കിടക്കുമ്പോൾ  മനസിലാക്കുന്നു, അവളെ ഞാൻ എന്ത് മാത്രം ഇഷ്ടപ്പെട്ടിരുന്നുവെന്നു. അവളെ ഒരു നോക്ക് കാണണമെന്ന്!! അവളോട് മാപ്പു പറയണമെന്ന്!! എനിക്കിവിടുന്നു എങ്ങിനെയും പുറത്തു ചാടിയെ മതിയാകൂ.. ഇവിടെയുള്ള എന്റെ ഏകാന്തത എന്നെ കൊല്ലുന്നു. അതിനു ഞാൻ എന്തും ചെയ്യും.

മണിരത്നം ഇത് വരെ ചെയ്തിട്ടുള്ള എല്ലാ പ്രണയചിത്രങ്ങളും ഒന്ന് വിശകലനം ചെയ്‌താൽ, ഒരു സാധാരണ spoonfeeding പൈങ്കിളി പ്രണയകഥകൾ അല്ല എന്ന് നമുക്ക് മനസിലാകും. അലപായുതേ, ഓകെ കണ്മണി, ദിൽ സെ, ബോംബെ, റോജ,  ഗീതാഞ്ജലി,മൗനരാഗം മുൻപ് അദ്ദേഹം സംവിധാനം ചെയ്തിട്ടുള്ള പ്രണയകഥകളാണ്. ഇതെല്ലാം കണ്ടു കഴിഞ്ഞാൽ തന്നെ മനസിലാകും, പ്രണയത്തിലുണ്ടാവുന്ന സങ്കീർണതയും പിരിമുറുക്കങ്ങളും വിരഹങ്ങളും ആകും പറയാനുണ്ടാവുക. കാർത്തിയും അദിതിയും നായകനായിക വേഷങ്ങൾ കൈകാര്യം ചെയ്യുന്ന കാട്രു വെളിയിടൈ എന്ന ചിത്രം പറയുന്നതും മറ്റൊന്നുമല്ല. വിഷയം പ്രണയം തന്നെ. എന്നാൽ രണ്ടു വിത്യസ്ത ധ്രുവങ്ങളിൽ ഉള്ള രണ്ടു പേരുടെ പ്രണയമാണ് ഇത്തവണ അദ്ദേഹം പറയാൻ തിരഞ്ഞെടുത്തിരിക്കുന്നത്. സ്ത്രീയെ ആണിന്റെ കാൽക്കീഴിൽ കഴിയുന്ന ഒരു പെണ്ണ് മാത്രമാണ് എന്ന് കരുതുന്ന നായകനും, സ്വന്തമായി ഒരു വ്യക്തിത്വം കാത്തു സൂക്ഷിക്കണം എന്ന് വിചാരിക്കുന്ന നായികയും ആണ്, അവരുടെ ഇടയിൽ ഉണ്ടാവുന്ന പ്രത്യേകിച്ച് നായകൻ ഉണ്ടാക്കുന്ന പ്രശ്നങ്ങളും വികാര പ്രണയ പരവശയായ ഒരു നായികയെയും കാണാൻ കഴിയും. ഇന്നത്തെ കാലത്തു വളരെ വിരളമായി കാണുന്ന ഒരു പെൺകുട്ടി. സിനിമാ കാഴ്ചകൾക്കിടെ പലപ്പോഴും വർഷങ്ങൾക്കു മുൻപ് ഉണ്ടായിരുന്ന എന്നിലെ ഞാനേ കാർത്തിയുടെ വരുണിൽ കാണാൻ  കഴിഞ്ഞു. ഒരു കാരണവുമില്ലാതെ പ്രണയിനിയോട് കലഹിച്ചും നിർബന്ധം പിടിച്ചും എന്റെ ദുശാഠ്യത്തിലും എന്റെ കൂടെ നിന്ന പെൺകുട്ടി. അവളെയും കാണാൻ കഴിഞ്ഞു. വർഷങ്ങൾക്ക് ശേഷം അതെ പറ്റി ചിന്തിക്കുമ്പോഴും ഈ സിനിമ കാണുമ്പോളും എന്നെ കുറ്റബോധം വേട്ടയാടികൊണ്ടേയിരുന്നു എന്നത് മറച്ചു വെയ്ക്കാൻ കഴിയാത്ത ഒരു സത്യം.

ഇനി സിനിമയിലേക്ക് തിരിച്ചു വരാം. ഈ പ്രണയകഥ തീർച്ചയായും സമൂഹത്തിലുള്ള എല്ലാവര്ക്കും ഇഷ്ടപ്പെടണമെന്നില്ല. സിനിമാസംവിധാന രംഗത്തു തന്റേതായ വ്യക്തിമുദ്ര പതിപ്പിച്ചിട്ടുള്ള ഒരു സംവിധായകനാണ് മണിരത്നം. കാർഗിൽ യുദ്ധത്തിന്റെ പശ്ചാത്തലത്തിൽ നടക്കുന്ന ഒരു പ്രണയകഥയാണ് അദ്ദേഹം ഇത്തവണ തിരഞ്ഞെടുത്തത്. അദ്ദേഹം അത് മികച്ച രീതിയിൽ അവതരിപ്പിക്കുകയും ചെയ്തു. സംഭാഷണങ്ങൾ എല്ലാം തന്നെ മികച്ചു നിന്നു. പ്രണയം തോന്നിപ്പിക്കുന്ന മികച്ച സംഭാഷണങ്ങൾ എന്ന് തന്നെ പറയേണ്ടി വരും. പക്ഷെ, അദ്ദേഹം ചെയ്ത ഏറ്റവും വലിയ ഒരു അബദ്ധം പാകിസ്ഥാൻ ജയിലിൽ നിന്നും ചാടുന്ന കാർത്തിയെയും കൂട്ടരെയും കാണിക്കുന്നത്. ഇത്ര വലിയ ഒരു ബ്ലണ്ടർ  ആയ സീൻ ഈ അടുത്ത കാലത്തു കണ്ടിട്ടില്ല. ജയിൽ ചുമര് തുറക്കുന്നതൊക്കെ ഷോഷാങ്ക് റിഡംപ്ഷനെ ഓർമ്മിപ്പിച്ചു. പിന്നീട് പാകിസ്ഥാൻ പോലീസിനെ എല്ലാം കബളിപ്പിച്ചു ബോർഡർ കടക്കുന്നതൊക്കെ എത്ര അസഹനീയവും അവിശ്വസനീയവുമായി തോന്നി. വളരെ മോശം എന്ന് മാത്രമേ പറയേണ്ടൂ. ഇങ്ങനെയാരുന്നെങ്കിൽ, പാകിസ്ഥാൻ ജയിലുകളിൽ ഒരു ഇന്ത്യൻ സൈനികനും ജയിൽശിക്ഷ അനുഭവിക്കില്ലായിരുന്നല്ലോ..

രവി വർമൻറെ ക്യാമറ മികച്ചു നന്നു. ചിത്രത്തിലെ മറ്റൊരു നാടി ആണ് വളരെ മനോഹരമായ പല തരം ഫിൽറ്ററുകളും മറ്റും ഉപയോഗിച്ചിട്ടുള്ള ഫ്രയിമുകൾ. ജീവിതത്തിൽ ഒരിക്കളെങ്കിലും കാശ്മീരിൽ പോകണമെന്നുള്ള ആശാ ഈ ചിത്രം കാണുന്നവരിൽ ഉണ്ടാകും. അത്ര മികവുറ്റ രീതിയായിരുന്നു.  ലെ ലഡാക്കും, സെർബിയയും ആയിരുന്നു കൂടുതലും ഷൂട്ട് ചെയ്തിരുന്നത്. ഈ രണ്ടു സ്ഥലത്തിന്റെയും മനോഹാരിത ചിത്രത്തിലുടനീളം നമുക്ക് പകർന്നു തന്നു രവി വർമൻ. കഥാപാത്രത്തിന്റെ കൂടി സഞ്ചരിക്കാനും അദ്ദേഹത്തിന്റെ ക്യാമറ മറന്നില്ല.  അദിതിയുടെ സൗന്ദര്യം കാൻവാസിൽ പകർത്തി അവരെ ഇന്നോളം കണ്ടിട്ടുള്ളതിൽ സുന്ദരിയായി തോന്നിപ്പിച്ചു. പാട്ടുകളുടെ ചിത്രീകരണത്തിലും ഒരു വ്യത്യസ്തത കൊണ്ട് വരാൻ  ശ്രമിച്ചതും അഭിനന്ദനീയം തന്നെ. അഴഗിയെ എന്ന ഗാനത്തിൽ ഉപയോഗിച്ച പല തരാം ഫിൽറ്ററുകളും ആംഗിളുകളും തന്നെ ഉദാഹരണം.


എ ആർ റഹ്‌മാൻ.. ഈ മനോഹരമായ പേരുള്ള വ്യക്തി ആണ് ഈ ചിത്രത്തെ തീയറ്ററിൽ കാണുവാൻ പ്രേരിപ്പിച്ചത്. അദ്ദേഹത്തിൻറെ ചിത്രത്തിലെ പാട്ടുകൾ മാത്രമല്ല പശ്ചാത്തല സംഗീതവും തീയറ്ററിൽ നിന്നും അനുഭവിക്കേണ്ടതാണ്. ഇവിടെയും എന്റെ പ്രതീക്ഷ അസ്ഥാനത്തായില്ല. പാട്ടുകൾ സിനിമയിലൂടെനീളം ഉപയോഗിച്ച രീതിയും സന്ദര്ഭത്തിനനുയോജ്യമായി അവലംബിച്ച സംഗീതവും ചിത്രത്തിന് കൊടുത്ത ഊർജം ചില്ലറയല്ല. എല്ലാ പാട്ടുകളും കേൾക്കാൻ വളരെ രസമുള്ളതാണ്. വർണം വാരി വിതറിയ സാരട്ടു വണ്ടിയിലെയും, സെർബിയൻ കാഴ്ചകൾ കാണിച്ചു തന്ന ജുഗ്‌നിയും, ഒരു പുതു ആശയം കൈക്കൊണ്ട അഴഗിയെ, മഞ്ഞു മൂടിയ വാൻ വരുവാനും, സൽസ പാർട്ടി ഡാൻസ് ഒക്കെ നിറഞ്ഞ വിത്യസ്ത ഗാനങ്ങളുടെ ഒരു സമാഹരണം തന്നെയായിരുന്നു.

ശാം കൗശൽ നിർവഹിച്ച ആക്ഷൻ കൊറിയോഗ്രാഫി പ്രത്യേകിച്ചും ചേസിലും മറ്റും യാതൊരു വിധ നിലവാരവും പുലർത്തിയില്ല എന്നത് വിഷമകരമായ കാര്യം. എന്നാൽ ബ്രിന്ദയുടെ കൊറിയോഗ്രാഫി മികച്ചു നിൽക്കുകയും ചെയ്തു.

കാർത്തി വരുൺ എന്ന തന്റെ കഥാപാത്രം തരക്കേടില്ലാതെ ചെയ്തു. പക്ഷെ പലയിടങ്ങളിലും അദ്ദേഹത്തിൻറെ പോരായ്മ   വ്യക്തമായിരുന്നു. ആർ. മാധവൻ അല്ലെങ്കിൽ സൂര്യ ഈ വേഷം ചെയ്തിരുന്നുവെങ്കിലെന്നു ഒരു നിമിഷം ആശിച്ചു പോയി. വികാരതീവ്രത വരുന്ന സീനിലൊക്കെ അദ്ദേഹത്തിൻറെ സ്ഥിരം പ്രക്രിയയായ കണ്ണുരുട്ടൽ  തോന്നി. എന്നെ അമ്പരപ്പിച്ചു കളഞ്ഞത്  അദിതിയാണ്. മികച്ച അഭിനയം ആണ് അവർ കാഴ്ച വെച്ചത്.  ഡയലോഗ് ഡെലിവെറിയിലും അഭിനയത്തിലും അവർ കാർത്തിയെ ശരിക്കും നിഷ്പ്രഭമാക്കി കളഞ്ഞു. സൗന്ദര്യം !!! ഹോ!!! ഓരോ ഫ്രെയിമിലും അവരെ കാണാൻ ഒരു പ്രത്യേക ചേല് തന്നെയുണ്ടായിരുന്നു.

RJ ബാലാജി അധികം ഡയലോഗ് ഒന്നുമില്ലാരുന്നുവെങ്കിലും അൽപം ചിരി സിനിമക്ക് പകരാനായി. നന്നായി തന്നെ ചെയ്തു. സ്ഥിരം ചളിയിൽ നിന്നുമൊക്കെ ഒരു മുക്തി. അദിതിയുടെ ലീലയുടെ കൂട്ടുകാരിയായി വന്ന നിധി എന്ന ഡോക്ടറെ അവതരിപ്പിച്ച രുക്മിണി നല്ല പ്രകടനം ആണ് കാഴ്ച വെച്ചത്. അവരുടെ ഡാൻസ് നല്ല രസമുണ്ടായിരുന്നു കാണുവാൻ. കെപിഎസി ലളിത, ഡൽഹി ഗണേഷ് തുടങ്ങിയവരും തങ്ങളുടെ റോളുകൾ തരക്കേടില്ലാതെ ചെയ്യുകയും ചെയ്തു.

മൊത്തത്തിൽ പറഞ്ഞാൽ എന്റെ ജീവിതവുമായി അൽപം കലർന്ന് കിടക്കുന്നതും കുറച്ചു അപാകതകൾ ഉണ്ടെങ്കിലും എനിക്ക് കണ്ടിരിക്കാൻ കഴിയുന്ന ഒരു ചിത്രമായി മാറി കാട്രു വെളിയിടൈ. 

റഹ്‌മാൻജിയുടെ സംഗീതം, രവി വർമൻറെ ക്യാമറയും, ബ്രിന്ദയുടെ ഡാൻസ് കൊറിയോഗ്രാഫി, അദിതിയുടെ സൗന്ദര്യവും, പിന്നെ ഒരു പ്രണയകഥയ്ക്കും വേണ്ടി ഒരു തവണ കണ്ടിരിക്കാൻ കഴിയുന്ന ഒരു ചിത്രമായി മാറുന്നു കാട്രു വെളിയിടൈ.

എൻറെ റേറ്റിംഗ് 7 ഓൺ 10

242. Angamaly Diaries (2017)

അങ്കമാലി ഡയറീസ് (2017)

Language : Malayalam
Genre : Action | Comedy | Crime
Director : Lijo Jose Pellissery
IMDB : 8.7

Angamaly Diaries Theatrical Trailer

ഒരു സിനിമ ചെയ്യുന്നത് അത്ര എളുപ്പം ഒന്നുമല്ല എന്ന് എല്ലാവർക്കും അറിയാം,  അതും സിനിമയിലെ മുഴുവൻ അഭിനേതാക്കളും പുതുമുഖങ്ങൾ ആവുമ്പോൾ സിനിമ സംവിധാനം ചെയ്യുന്നതിലുള്ള റിസ്ക് കുറച്ചു കൂടുതലായിരിക്കും. മിക്ക സംവിധായകരും പഴകി തേഞ്ഞ രീതികൾ അവലംബിക്കുമ്പോൾ വ്യത്യസ്തമായ രീതികളും മുറകളും ഉപയോഗിച്ച് സംവിധാനം ചെയ്തു തന്റേതായ മുദ്ര പതിപ്പിക്കാൻ ശ്രമിക്കുന്ന ഒരു യുവ സംവിധായകൻ ആണ് ലിജോ ജോസ് പെല്ലിശേരി. അദ്ദേഹത്തിൻറെ ഇതിനു മുൻപ് ഇറങ്ങിയ ഡബിൾ ബാരൽ എനിക്ക് വളരെയധികം ഉണ്ടാക്കിയ ഒരു ചിത്രം കൂടി ആയിരുന്നു. നാട്ടിൽ നിന്നുമുള്ള പോസിറ്റീവ് നിരൂപണങ്ങളും അഭിപ്രായങ്ങളും എന്നെ ഈ സിനിമ കാണുവാൻ ഗൾഫു നാട്ടിലെ തീയറ്ററിലേക്കെത്തിച്ചു.

ഈ ചിത്രം വിൻസൻറ് പെപെ എന്ന ചെറുപ്പക്കാരനും അയാളെ ചുറ്റിപ്പറ്റിയുള്ള ജീവിതവും ആണ് റിയലിസ്റ്റിക്കായി പറയുന്നത്. വിൻസൻറ് പെപെ ആണ് നായകൻ എന്ന് പറയാമെങ്കിലും, ഈ ചിത്രത്തിലഭിനയിച്ച എൺപതിൽ പരം അഭിനേതാക്കളും നായകന്മാർ എന്നാണെന്റെ അഭിപ്രായം. അവരാണല്ലോ കഥയെ മുൻപോട്ടു നയിച്ച് കൊണ്ട് പോകുന്നത്. തങ്ങളുടെ ആദ്യ സിനിമയാണെന്ന് ലവലേശം പ്രേക്ഷകരുടെ മനസിൽ തോന്നാത്ത രീതിയിലുള്ള  അഭിനയപ്രകടങ്ങൾ ആണ് ചിത്രത്തിൻറെ പ്രധാന ആകർഷണം.

വിൻസൻറ് പെപെ ആയി ആന്റണി  വർഗീസ്, ലിച്ചി ആയി രേഷ്മ രാജൻ, വർക്കി ആയി കിച്ചു ടെല്ലസ്, ഭീമൻ ആയി വിനീത് വിശ്വം, 10ml തോമസ് ആയി ബീറ്റോ ഡേവിസ്, u-clamp രാജൻ ആയി ടിറ്റോ വിത്സൺ, അപ്പാനി രവി ആയി ശരത് കുമാർ, കുഞ്ഞൂട്ടി ആയി സിനോജ് വർഗീസ് എന്ന് വേണ്ട ഒരു മിനുട്ട് തല കാണിച്ചവർ വരെ തകർപ്പൻ പ്രകടനം ആണ് കാഴ്ച വെച്ചത്. പച്ചയായ ജീവിതത്തിന്റെ ആവിഷ്കാരം അവതരിപ്പിക്കുന്നതിൽ സംവിധായകനും അഭിനേതാക്കളും കൂട്ടായി നിന്നതു കൊണ്ട് തന്നെ ചിത്രം ഒരു സമ്പൂർണ്ണ സംതൃപ്തി നൽകി. ഗിരീഷ് ഗംഗാധരന്റെ ക്യാമറ മികച്ചു നിന്നു. കഥാപാത്രങ്ങളുടെ കൂടെയുള്ള യാത്രയായിരുന്നു സിനിമയിലൂടെ നീളം ക്യാമറ.
ഷമീർ മുഹമ്മദിൻറെ എഡിറ്റിങ്ങും മികച്ചു നിന്നു. പ്രശാന്ത് പിള്ളയുടെ ഗാനങ്ങൾ മികച്ചു നിന്ന്. ദോ നൈന, തീയാമേ ഒക്കെ കേൾക്കാൻ നല്ല രസമുള്ള ഗാനങ്ങൾ ആയിരുന്നു. പക്ഷെ ഒരു ലോക്കൽ ചിത്രത്തിൽ എന്തിനു ഹിന്ദി ഗാനം ഉപയോഗിച്ച് എന്നതാണ് എന്റെ സംശയം. പശ്ചാത്തല സംഗീതം ചില ഇടങ്ങളിൽ മികവ് പുലർത്തിയെങ്കിലും, ചില ഇടങ്ങളിൽ അനാവശ്യമായ വാദ്യോപകരണങ്ങളുടെ ഉപയോഗം മൂലം അരോചകം ആയി തോന്നുകയും ചെയ്തു.

ചെറിയ ചെറിയ കുറ്റങ്ങളുമൊക്കെ ഉണ്ടെങ്കിലും അതൊക്കെ അവഗണിക്കുന്നതാണ് നല്ലതെന്നു തോന്നുന്നു.
വളരെയേറെ ആസ്വദിച്ച ചിത്രമായാണ് കൊണ്ടും ഞാൻ കൊടുക്കുന്ന മാർക്ക് 10ഇൽ 8.2 ആണ്.

241. SPL2: Saat Po Long 2 (Kill Zone2 : A Time For Consequences) (2015)

എസ്പിഎൽ 2 : സാഥ് പോ ലോങ്ങ് 2 (കിൽ സോൺ 2 : എ ടൈം ഫോർ കോൺസെക്യുൻസസ്‌) (2015)

Language : Mandarin | Thai
Genre : Action | Crime | Drama
Director : Cheung Pou-Soi
IMDB : 6.7

SPL2 : A Time For Consequences Theatrical Trailer

അവയവകടത്തും അതിനോടനുബന്ധിച്ച കുറ്റകൃത്യങ്ങളും വർധിച്ചു വരുന്ന ഒരു കാലഘട്ടമാണ് നമ്മുടേത്. യാതൊരു മാർഗത്തിലും ഇതിനൊരു തടയിടാൻ കഴിയാത്തത്ര ഈ ക്രൈം ഇന്ന് ലോകത്തു വളർന്നിട്ടുണ്ട്. ഇതേ ആശയം ഉപയോഗിച്ച് നിരവധി ചിത്രങ്ങളും പുറത്തിറങ്ങിയിട്ടുണ്ട്.  തൻറെ സ്വയലാഭത്തിനു വേണ്ടി ഏതറ്റവും വരെയും പോകുന്ന നീചന്മാരായ ആളുകൾ തിങ്ങി വസിക്കുന്ന ഒരിടമാണല്ലോ ഭൂമിയെന്നോർക്കുമ്പോഴാണ് വ്യസനം. 

എസ്പിഎൽ എന്ന ചിത്രത്തിൻറെ വിജയത്തിനു ശേഷം ആണ് ഇങ്ങനെ ഒരു സീക്വൽ വരുന്നത്. പേരിൽ മാത്രമേ തുടർച്ചയുള്ളൂവെങ്കിലും, പുതിയ കഥാപാത്രങ്ങളും കഥാസന്ദർഭവും ആണ് ചിത്രത്തിൻറെ സംവിധായകൻ ആയ ച്യൂങ് പോ സോയി തിരഞ്ഞെടുത്തത്.

ഡ്രഗ് - അവയവ കടത്തു മാഫിയയിൽ രഹസ്യമായി ചാരപ്രവർത്തി ചെയ്യുന്ന ഒരു പോലീസുകാരനായിരുന്ന കിറ്റ്, ഒരു ഏറ്റുമുട്ടലിനിടയ്ക്ക് തൻറെ രഹസ്യം പുറത്താവുന്നു.  തങ്ങളെ ചതിച്ചതിനു പകരമായി അയാളെ വേറൊരു തായിലാൻഡിലുള്ള ഒരു ജയിലിൽ പാർപ്പിക്കുന്നു. അവിടെ ചായ് എന്ന ഒരു കോൺസ്റ്റബിൾ ആണ് കിറ്റിനെ നോക്കാൻ ജയിലധികൃതർ ഏൽപ്പിച്ചിരിക്കുന്നത്. ലുക്കീമിയ ബാധിച്ച ഒരു ചായിന്റെ കുട്ടിയെ രക്ഷപെടുത്തണമെങ്കിൽ കിറ്റ് വിചാരിച്ചാൽ മാത്രമേ നടക്കുള്ളൂ. കിറ്റാരാണെന്നു മനസിലാക്കുന്ന ചായ് അയാളെ രക്ഷിക്കാൻ ശ്രമിക്കുന്നു. പിന്നീട് അവർ മാഫിയയെ എങ്ങിനെ കീഴ്പ്പെടുത്തുന്നതോടെ ചിത്രം അവസാനിക്കുന്നു.

വയലൻസിൻറെ അതിപ്രസരമുള്ള ആക്ഷൻ സീക്വൻസുകൾ ആണ് ചിത്രത്തിൻറെ ഹൈലൈറ്റ്. പക്ഷെ പ്രവചനാതീതമായ കഥയും തിരക്കഥയും ചിത്രത്തിന്റെ ബലഹീനതയുമാണ്. ത്രില്ലടിക്കാൻ പാകത്തിലുള്ള ആഖ്യാനത്തിൻറെ അഭാവവും ചിത്രത്തെ പിന്നോട്ടടിക്കുന്നു. പശ്ചാത്തല സംഗീതം, ക്യാമറ, ആക്ഷൻ എന്നീ നിലകളിൽ നിലവാരം പുലർത്തി.  

കിറ്റ് എന്ന പോലീസുദ്യോഗസ്ഥനായി വൂ ജിങ് അഭിനയിച്ചു. സത്യം പറഞ്ഞാൽ വൂ ജിങ്ങിനെ എനിക്കത്ര കണ്ടു മതിപ്പില്ല. അഭിനയത്തിലും ആക്ഷനിലും നല്ല ഓവർ ആക്ടിങ് ആണ്. ഈ ചിത്രത്തിലും വ്യത്യാസമായി ഒന്നുമില്ലാരുന്നു. പക്ഷെ ആക്ഷൻ ചെയ്തിരിക്കുന്നത് നന്നായി. ടോണി ജായുടെ പഴയ പ്രഭാവം ഒന്നും ഈ ചിത്രത്തിൽ കാണാൻ കഴിഞ്ഞില്ല.  ഒരു സൈഡ് ആക്ടർ എന്ന രീതിയിൽ മാത്രമാണ് എനിക്ക് തോന്നിയത്. സൈമൺ യാം പതിവ് പോലെ നന്നായി ചെയ്തു. ഴാങ് ജിൻ,  തരക്കേടില്ലാത്ത പ്രകടനം കാഴ്ച വെച്ചു. പ്രധാന വില്ലൻ ഈ ചിത്രത്തിൽ കാമിയോ അപ്പിയറൻസ് ആണ് എന്നതൊരു പ്രത്യേകത ആണ്. മ്ലാനവും എന്നാൽ ശാന്തപ്രകൃതവും ഉള്ള ഒരു വില്ലൻ. ലൂയിസ് കൂ ആണ് വില്ലനായ മിസ്റ്റർ ഹാങിനെ അവതരിപ്പിച്ചത്.

മൊട്ടത്തതിൽ പറഞ്ഞാൽ വലിയ പ്രതീക്ഷ ഒന്നും വെയ്ക്കാതെ കാണുകയാണെങ്കിൽ ഇഷ്ടപ്പെടാൻ സാധ്യത ഉള്ള ചിത്രം. ആദ്യ ഭാഗവുമായി താരതമ്യം ചെയ്‌താൽ വലിയ മെച്ചം ഒന്നും തോന്നുകയുമില്ല.

എൻറെ റേറ്റിംഗ് 5.5 ഓൺ 10

240. The Lego Batman Movie (2017)

ദി ലിഗോ ബാറ്റ്മാൻ മൂവി (2017)

Language : English
Genre : Action | Animation | Adventure | Comedy | Family
Director : Chris McKay
IMDB : 7.7

The Lego Batman Movie Theatrical Trailer

മൂന്നു വർഷം മുൻപ് ക്രാഗിൾ എന്ന ദുഷ്ടശക്തിയിൽ നിന്നും ലോകത്തെ രക്ഷിച്ച എമറ്റും കൂട്ടരെയും സഹായിക്കാൻ മുൻപിൽ നിന്ന ബാറ്റ്മാൻ ഗോതം സിറ്റിയിൽ മടങ്ങിയെത്തി തന്റെ രക്ഷാപ്രവർത്തനം നടത്തി പോന്നു. ജോക്കർ എന്ന ഭീകര വില്ലൻ ഉയർത്തിയ ഭീഷണി മാറി കടക്കാൻ ശ്രമിക്കുന്ന ബാറ്റ്മാൻ ജോക്കറോട് പറയുന്നു, "നീ എനിക്ക് ചേർന്ന വില്ലനെ അല്ല" എന്നു. ഇത് കേട്ട ജോക്കറിന് വിഷമം ആകുകയും എങ്ങിനെയും ബാറ്റ്മാനോട് ഒരിക്കലും മറക്കാനാവാത്ത പക പോക്കണം എന്ന തീരുമാനത്തിലെത്തുകയും ചെയ്യുന്നു. അന്നേ ദിവസം കമ്മീഷണർ ഗോർഡൻറെ വിരമിക്കൽ ചടങ്ങിനിടെ ഗോർഡൻറെ മകളായ ബാർബറ കമ്മീഷണർ പദവി ഏറ്റെടുക്കുന്നു. ബാറ്റ്‌മാനെ അല്പം തരാം താഴ്ത്തി പറയുകയും കുറ്റങ്ങൾക്കെതിരെ പോരാടാൻ ബാറ്റ്മാൻ എന്ന ആളെ ആവശ്യമില്ലെന്നും, കുറ്റകൃത്യങ്ങൾ അമർച്ച ചെയ്യാൻ ബാറ്റ്മാൻ തങ്ങളെ സഹായിക്കട്ടെയെന്നും പറയുന്നതു കേട്ട് നായകന് വളരെയധികം അമർഷം ഉണ്ടാവുന്നു. പിന്നീടുള്ളത് പറഞ്ഞാൽ സ്പോയിലർ ആകുമെന്ന കൊണ്ട് നിർത്തുന്നു.

കുറച്ചധികം സീരിയസ് ആയി കണ്ടു വന്ന ബാറ്റ്മാൻ എന്ന കഥാപാത്രം ആദ്യ ഭാഗമായി വന്ന ലിഗോ മൂവിയിൽ ചിരിപ്പിച്ചുവെങ്കിലും ഈ ചിത്രത്തിൽ ഒരു ചിരിലഹളയാക്കുകയാണ് ബാറ്റ്മാൻ. തുടക്കം മുതൽ അവസാനം വരെയും കൗണ്ടറുകളും തകർപ്പൻ കോമഡി ഡയലോഗുകളും കൊണ്ട് ബാറ്റ്മാൻ തകർത്ത് വാരുകയാണ്. സെൽഫ് ട്രോളുകളും കൗണ്ടറുകളും നിരവധി ആണ്. വില്ലനായ ജോക്കർ വരെ തമാശകളുണ്ടാക്കുന്നുവന്നതും ശ്രദ്ധേയം. 

ലിഗോ മൂവിയുടെ അനിമേഷൻ കോർഡിനേറ്റർ ആയിരുന്ന ക്രിസ് മക്കെ ആണ് ഈ ചിത്രം സംവിധാനം ചെയ്തിരിക്കുന്നു. ലിഗോ മൂവീ അവശേഷിപ്പിച്ച അളവ്കോലിനു ഒരു കോട്ടവും തട്ടാതെ തന്നെ അദ്ദേഹം ചിത്രം ചെയ്തിരിക്കുന്നു. നർമമുഹൂർത്തങ്ങളും ആക്ഷൻ രംഗങ്ങളും അൽപം വൈകാരികതയും കലർത്തിയെടുത്ത ചിത്രം മനോഹരമായി തന്നെ വന്നു ഭവിച്ചു. 

വിൽ ആർനറ്റ് ആണ് ബാറ്റ്മാന് ശബ്ദം നൽകിയത്. ആ ശബ്ദത്തിനു തന്നെ ഒരു പ്രത്യേകത ഉണ്ടായിരുന്നു. വില്ലിനെ കൂടാതെ സാക്ക് ഗലീഫിയനാകിസ് , മൈക്കൽ സെറ, റൊസാരിയോ ഡോസൻ, റാൾഫ് ഫിയെൻസ്, മറയ കാരി, സൊ ക്രാവിത്സ് തുടങ്ങിയ പ്രമുഖരും കഥാപാത്രങ്ങൾക്ക് ശബ്ദം കൊടുത്തിരിക്കുന്നു.

എത്ര കലുഷിതമായ മനസുള്ള പ്രേക്ഷകന് ആണെങ്കിലും ഈ ചിത്രം കണ്ടു കഴിഞ്ഞാൽ മനസ് നിറഞ്ഞു ചിരിക്കുമെന്നു ഉറപ്പാണ്. കണ്ടിട്ടില്ലാത്തവർ കാണണമെന്ന് അഭ്യർത്ഥിക്കുന്നു.

എൻറെ റേറ്റിംഗ് 09 ഓൺ 10 

ലിഗോ സീരീസിലെ ആദ്യചിത്രമായ ലിഗോ മൂവിയുടെ അത്രയും വിജയം നേടാൻ കഴിഞ്ഞില്ല എന്നത് ഒരു വിഷമകരമായ വാർത്തയാണ്. എന്ന് കരുതി ഫ്ലോപ്പ് എന്നല്ല ഉദ്ദേശിച്ചത്.

239. SPL: Sha Po Land (Kill Zone) (2005)

എസ്പിഎൽ : ഷാ പോ ലാൻഡ് (കിൽ സോൺ) (2005)

Language : Mandarin
Genre : Action | Crime | Drama | Thriller
Director : Wilson Yip
IMDB : 7.1

SPL: Sha Po Land Theatrical Trailer

ഹോംഗ് കോങ്ങ് അടക്കി ഭരിച്ചിരുന്ന ഒരു ക്രൂരനായ മാഫിയ തലവനാണ് വോങ് പോ. വോങ് പോയെ കുടിക്കാനായി കണ്ണിലെണ്ണയൊഴിച്ചു നടക്കുന്ന മൂന്നു പോലീസുകാരുടെ തലവൻ ആണ് പോലീസ് ഇൻസ്‌പെക്ടർ ആയ ചാൻ. 

ചാനിനോട് ഏറ്റവും കൂറുള്ള മൂന്നു പേരാണ് ഉള്ളത്, വാഹ്, സും, ലോക്. ഒരു നാൾ വോങ് പോയ്ക്കെതിരെ കേസിൽ സാക്ഷിയെ കൊണ്ട് കോടതിയിൽ പോകുന്ന വഴിക്കു വാടകകൊലയാളി ആയ ജാക്ക് വണ്ടിയിടിച്ചു സാക്ഷിയെ വക വരുത്തുന്നു. തെളിവൊന്നുമില്ലാതെ വോങ് പോയെ കോടതി കുറ്റ വിമുക്തനാക്കുന്നു. ആ അപകടത്തിൽ നിന്നും രക്ഷപെട്ട സാക്ഷിയുടെ മകളെ ചാൻ എടുത്തു വളർത്തുന്നു. പക്ഷെ, ദുരന്തം അവിടം കൊണ്ടും തീരുന്നില്ല, ചാനിൻറെ മസ്തിഷ്കത്തിൽ ഒരു ടൂമർ വളരുന്നുണ്ടെന്നു ഡോക്ടർ പറയുന്നു. തൻറെ ടൂമർ വളരുന്നതിനൊപ്പം പകയും വളർന്നു, എങ്ങിനെയും വോങ് പോയെ നിയമത്തിനു മുൻപിൽ കൊണ്ട് വരണമെന്നാണ് ഒരു ജീവിതാഭിലാഷമായി എടുക്കുന്നു.

മൂന്നു വർഷം അങ്ങിനെ പിന്നിടുന്നു, ചാൻ വിരമിക്കുന്ന ദിവസം അടുത്തു കൊണ്ടേയിരുന്നു. ചാനിന്റെ കയ്യിൽ നിന്നും ഔദ്യോഗികമായി ചുമതലയേൽക്കുന്നതിനായി മാ ക്യൂൻ എത്തുന്നു.  ഇവർ അഞ്ചു പേരും എങ്ങിനെ വോങ് പോയെ കുടുക്കുന്നുവന്നതാണ് ചിത്രത്തിൻറെ ഇതിവൃത്തം. ഒരു രാത്രി നടക്കുന്ന സംഭവമാണ് ചിത്രത്തിൻറെ രണ്ടാം പകുതി എന്നതും വളരെ ത്രിൽ നൽകുന്നതുമാണ്.

ചിത്രത്തിൻറെ സംവിധായകൻ ആയ വിത്സൺ യിപ് നിരവധി ആക്ഷൻ സിനിമകളുടെ സംവിധായകൻ, ചിത്രത്തിൽ കൂടുതലും ബോക്സോഫീസ് വിജയവും നേടിയവയാണ്. ചിത്രത്തിന്റ ഇതിവൃത്തം കേൾക്കുമ്പോൾ സാധാരണമായി തോന്നുമെങ്കിലും മേക്കിങ് കൊണ്ട് ചില ട്വിസ്റ്റുകൾ കൊണ്ട് വളരെ മികച്ചതാക്കി കൊണ്ട് പോകുന്നു. പ്രേക്ഷകന് നൽകുന്ന ഉദ്യോഗജനകമായ സീനുകൾ ഒരു നല്ല COP - ACTION സിനിമകൾക്ക് യോജിച്ച രീതിയിൽ ആണ്. ചിത്രത്തിൻറെ ഭൂരിഭാഗം സീനുകളും രാത്രിയിൽ ആണ് ചിത്രീകരിച്ചിരിക്കുന്നത്, അതിനാൽ ലൈറ്റിങ്ങും ക്യാമറയ്ക്കും ഉള്ള ജോലിയും കൂടുതലാണെന്നു ഞാൻ പറയാതെ തന്നെ മനസിലാകുമല്ലോ. ഈ രണ്ടു മേഖലയിലും യാതൊരു കുറവും വരുത്താതെ തന്നെ നിർവഹിച്ചിട്ടുണ്ട്. ലാം വാ ചെൻ ആണ് ക്യാമറ ചലിപ്പിച്ചത്. പശ്ചാത്തല സംഗീതം ഒരു ഹോളിവുഡ് ലെവലിൽ നിന്നു. ചടുലമായ എഡിറ്റിങ്ങും തകർപ്പൻ ആക്ഷൻ കൊറിയോഗ്രഫിയും ചിത്രത്തിൻറെ മികവ് ഉയർത്തുന്നു.

ഡോണി യെൻ, സൈമൺ യാം എന്നിവർ യഥാക്രമം മാക്വീൻ ചാൻ എന്ന കഥാപാത്രങ്ങൾ അവതരിപ്പിച്ചിരിക്കുന്നു.  രണ്ടു പേരും വളരെ മികച്ച പ്രകടനം ആയിരുന്നു. സൈമൺ യാം ഒരു പിടി മുന്നിൽ വികാരങ്ങൾ കൊണ്ട് നിറഞ്ഞെങ്കിൽ ടോണി ആക്ഷനിൽ തകർപ്പൻ പ്രകടനം കാഴ്ച വെച്ച്. പ്രസിദ്ധനായ സമോ ഹാങ്ങ് ആണ് വില്ലനായ വോങ് പോയെ അവതരിപ്പിച്ചതു. ക്രൂരനായ വില്ലനായി തിളങ്ങിയെന്നു മാത്രമല്ല, അദ്ദേഹത്തിൻറെ പൊണ്ണത്തടി ഉണ്ടെങ്കിലും മാർഷ്യൽ ആർട്ടിലെ പ്രാഗത്ഭ്യം വിളിച്ചോതുന്ന ആക്ഷൻ സീനുകളും ആയിരുന്നു. വു ജിങ് വാടകക്കൊലയാളിയായ ജാക്കിനെ അവതരിപ്പിച്ചു. ആക്ഷൻ നല്ലതായിരുന്നുവെങ്കിൽ ഓവർ അഭിനയം കാരണം ഇത്തിരി മോശം എന്ന് പറയേണ്ടതായി വരും.

മൊത്തത്തിൽ പറഞ്ഞാൽ ഒരു കിടിലൻ ആക്ഷൻ ചിത്രമാണ് എസ്പിഎൽ.

എന്റെ റേറ്റിംഗ് 08 ഓൺ 10 

ഈ ചിത്രത്തിൻറെ രണ്ടാം ഭാഗം 2015ൽ ടോണി ജയയും വു ജിന്നും നായകനായി പുറത്തിറങ്ങിയിട്ടുണ്ട്. അതിന്റെ നിരൂപണമായി മറ്റൊരവസരത്തിൽ വരാം.

238. Logan (2017)

ലോഗൻ (2017)

Language : English | Spanish
Genre : Action | Adventure | Drama | Sci-Fi
Director : James Mangold
IMDB : 8.9

Logan Theatrical Trailer

സൂപർ ഹീറോ ചിത്രങ്ങൾ നിരവധി കണ്ടിട്ടുണ്ടെങ്കിലും ഞാൻ ഏറ്റവും അധികം ഇഷ്ടപ്പെടുന്ന അല്ലെങ്കിൽ ആരാധിക്കുന്ന ഒരു അമാനുഷിക നായകൻ ആണു വൂൾവറീൻ. കഥാപാത്രത്തിനോടുള്ള അഭിനിവേശം ആണൊ അതവതരിപ്പിച്ച നായകനോടുള്ള ഇഷ്ടക്കൂടുതൽ ആണൊയെന്നറിയില്ല. ചിലപ്പോൾ ആ കഥാപാത്രം അവതരിപ്പിക്കാൻ ഇതിലും മികച്ച ഒരു നടനും കാണില്ലായിരിക്കാം. ഹ്യു ജാക്ക്മാൻ അവതരിപ്പിക്കുന്ന അവസാന വൂൾവറീൻ കഥാപാത്രം എന്ന നിലയ്ക്കും രണ്ടു ട്രെയിലറും തന്ന പ്രതീക്ഷയും എന്നെ യു.എ.ഇ.ലെ ആദ്യ ഷോ കാണുവാൻ പ്രേരിപ്പിച്ചു.

ഊർജ്ജസ്വലനല്ലാത്ത വളരെയധികം ക്ഷീണിതനും ആയ ലോഗനിൽ നിന്നുമാണു ചിത്രം ആരംഭിക്കുന്നത്‌. ഒരു ലിമൂസിൻ ഡ്രൈവറായി സേവനമനുഷ്ഠിക്കുന്ന ലോഗൻ രോഗാതുരനായ പ്രൊഫസർ ചാൾസും കാലിബൻ എന്ന പിന്തുടരാൻ കഴിവുള്ള മ്യൂട്ടന്റുമായി മെക്സിക്കൻ ബോർഡറിലെ ഒരു സ്ഥലത്തു ഒളിച്ചു താമസിക്കുന്നു.  തന്റെ healing factor വർഷങ്ങളായുള്ള ജീവിതം കൊണ്ടു വഷളായിക്കൊണ്ടിരിക്കുന്ന ലോഗന്റെ അടുത്ത്‌ ലോറ എന്ന കുഞ്ഞു പെൺകുട്ടി വന്നു ചേരുന്നു. അവളെ തേടി ഒരു പറ്റം ദുഷ്ടരായ മനുഷ്യരുമുണ്ടായിരുന്നു.. അവരെ എങ്ങിനെ ചെറുത്തു പെൺകുട്ടിയെ രക്ഷിക്കും എന്നതാണ് ശേഷഭാഗം

മറ്റുള്ള വൂൾവറീൻ ചിത്രങ്ങൾ / മാർവൽ സിനിമകളെ അപേക്ഷിച്ചു നോക്കിക്കഴിഞ്ഞാൽ ഈ ചിത്രത്തിന് ശക്തമായ ഒരു കഥയുണ്ട്,  ആത്മാവുണ്ട്, ബന്ധങ്ങളുടെ ദൃഢത ഉണ്ട്, വീര്യം നിറഞ്ഞ അഭിനയമുഹൂർത്തങ്ങൾ ഉണ്ട്. ഇതൊരു മാർവൽ ചിത്രമാണെന്ന് മനസ്സിൽ വെയ്ക്കാതെ കാണാൻ ശ്രമിക്കുക. കാരണം അങ്ങിനെ ഒരു ചിന്ത ഈ ചിത്രം കാണുമ്പോൾ നിങ്ങളുടെ മനസിൽ ഉണ്ടാവില്ല. എന്നെ വിശ്വസിക്കാം.

വൂൾവറീൻ ത്രയത്തിലെ ആദ്യ ഭാഗം സംവിധാനം ചെയ്ത ജെയിംസ് മാൻഗോൾഡ്, സ്‌കോട്ട് ഫ്രാൻക് മൈക്കൽ ഗ്രീനുമൊപ്പം ചേർന്നാണ് കഥയും തിരക്കഥയും രചിച്ചിരിക്കുന്നത്. മുൻപ് പറഞ്ഞ പോലെ ശക്തമായ കഥ തന്നെയാണ് ഈ ചിത്രത്തിൻറെ ഹൈലൈറ്റ്. പ്രേക്ഷകനെ പിടിച്ചിരുത്താൻ കഴിയുന്ന എല്ലാ ഘടകങ്ങളും അതിന്റേതായ അളവിൽ മിശ്രണം ചെയ്തിട്ടുണ്ട്. തുടക്കം മുതൽ പ്രേക്ഷകനെ ചിന്തിപ്പിക്കുന്ന തരത്തിലുള്ള ആഖ്യാനം. നിരവധി ചോദ്യങ്ങൾ ഉള്ളിൽ ഉടലെടുക്കും, പക്ഷെ ക്രമേണ ഓരോ ചോദ്യങ്ങളുടെയും ഉത്തരം അവരുടെ സംഭാഷണത്തിൽ കൂടി മനസിലാകും. അത് കൊണ്ട് ഇതൊരു സമ്പൂർണ ആക്ഷൻ ചിത്രം എന്ന ലേബലിൽ കാണുവാൻ ശ്രമിക്കാതിരിക്കുക. കാരണം, സംഭാഷണങ്ങൾക്ക് ഈ ചിത്രത്തിൽ വളരെ പ്രാധാന്യം കൊടുത്തിട്ടുണ്ട്. ചിത്രത്തിന്റെ ആഖ്യാന രീതി പ്രേക്ഷകന്റെ മനസ്സിൽ ഒരു പിരിമുറക്കം സൃഷ്ടിക്കാനും കഴിഞ്ഞിട്ടുണ്ട്. ഒരു സീരിയസ് സിനിമയിൽ അല്പസ്വല്പം തമാശയും കലർത്താൻ കഴിഞ്ഞിട്ടുണ്ട് സംവിധായകന്, അതിനാൽ പ്രേക്ഷകന് ബോറടിക്കാതെ ആസ്വാദ്യകരമാകുകയും ചെയ്തു.

ആക്ഷൻ സീനുകൾ top notch എന്ന് തന്നെ പറയേണ്ടി വരും. പ്രത്യേകിച്ച് ലോഗൻ, ലോറ എന്നിവരുടെ ആക്ഷൻ സീനുകൾ, വളരെ മികച്ചു നിൽക്കുന്ന രക്തച്ചൊരിച്ചിൽ ഉള്ള ആക്ഷൻ ചിത്രവുമാണ്. ആക്ഷൻ സീനുകൾ വിശ്വാസ്യകരവുമാണ്. ഡെഡ്പൂൾ കഴിഞ്ഞാൽ ചിലപ്പോൾ ഏറ്റവും കൂടുതൽ bloodshed gore violence  ഉള്ള മാർവൽ ചിത്രമാകും ലോഗൻ.

ചിത്രത്തിൻറെ പശ്ചാത്തല സംഗീതം നിർവഹിച്ചിരിക്കുന്നത് പ്രസിദ്ധനായ മാർകോ ബെൽട്രാമി ആണ്. അദ്ദേഹത്തിന്റെ പഴയ സിനിമകളേക്കാൾ വെല്ലുന്ന സംഗീതം ചിത്രത്തിന് കുറച്ചൊന്നുമല്ല സംഭാവന ചെയ്തത്. ടെൻഷൻ നിറഞ്ഞ മോഡിലേക്ക് കൊണ്ട് പോകാൻ അതിനാൽ വളരെ എളുപ്പവുമായിരുന്നു

എടുത്തു പറയേണ്ട അടുത്ത പ്രധാന ഘടകം ക്യാമറവർക്ക്. ആക്ഷൻ ചിത്രങ്ങളുടെ ക്യാമറാമാന് എപ്പോഴും പിടിപ്പതു പണിയുണ്ടാവും. കാരണം വേഗത കൂടിയ ആക്ഷൻ രംഗങ്ങൾ പ്രേക്ഷകന്റെ മനം കവരണമെങ്കിൽ അത്രയും മികച്ച ക്യാമറ വർക് വേണം. നിരവധി മുന്തിയ സംവിധായകരോടുമൊത്തു ജോലി ചെയ്ത ജോൺ മത്തീസൻ ആണ് ഈ ചിത്രത്തിന് വേണ്ടി ക്യാമറ ചലിപ്പിച്ചത്. ഇമോഷണൽ സെൻസ് ഒക്കെ വളരെ മികച്ച രീതിയിൽ തന്നെ ചെയ്തു. ഓരോ ഫ്രേമും ആംഗിളുകളും എനിക്ക് വളരെയധികം ഇഷ്ടപ്പെട്ടു.
എഡിറ്റിങ് നിർവഹിച്ച മൈക്കൽ മക്കസ്കർ പ്രത്യേക പ്രശംസ അർഹിക്കുന്നുണ്ട്. ഒരിടത്തു പോലും ലാഗ് വരുത്താതെ crispy എഡിറ്റിങ് ആയിരുന്നു അദ്ദേഹം ചെയ്തത്.

ഹ്യു ജാക്ക്മാൻ എന്ന നടന്റെ കഴിവിനെ പരമാവധി ചൂഷണം ചെയ്ത ചിത്രമായിരിക്കും ലോഗൻ. തൻറെ പതിനേഴു വർഷത്തെ വൂൾവറീൻ അവതരണത്തിൽ, ഇത് വരെ അദ്ദേഹം മോശം അഭിനയം കാഴ്ച വെച്ചിട്ടില്ല. എന്നാൽ ഈ ചിത്രത്തിൽ പതിന്മടങ്ങു ശൗര്യത്തോടെയും പൂർണതയിലുമാണദ്ദേഹം തൻറെ ലോഗൻ അഥവാ വൂൾവറീൻ എന്ന കഥാപാത്രത്തെ അവതരിപ്പിച്ചു. ഓരോ സീനും മികച്ചു നിന്നു. ചിലയിടങ്ങളിൽ നമ്മുടെ കണ്ണുകളെ ഈറനണിയിപ്പിക്കാൻ കഴിയുകയും ചെയ്തു.

പതിനൊന്നു വയസുകാരിയായ കൊച്ചു മിടുക്കി ഡാഫ്‌നെ കീൻ ആണ് ലോറ എന്ന മറ്റൊരു കേന്ദ്ര കഥാപാത്രത്തെ അവതരിപ്പിക്കുന്നത്. അത്യുഗ്രൻ പ്രകടനം. നോട്ടത്തിലും ഭാവത്തിലും അവതരണത്തിലും ഒരിക്കൽ പോലും തൻറെ ആദ്യ ചിത്രമാണിത് എന്ന ചിന്ത നമ്മളിലേക്ക് പകർന്നു തരുന്നില്ല. മാസ് എലമെന്റുകൾ ധാരാളം ആ കുട്ടിയിൽ ചാർത്തപ്പെട്ടിട്ടുണ്ട്. തീയറ്റർ/ടെലിവിഷൻ നടൻ വില കീൻ-ന്റെ മകൾ ആണ് ഡാഫ്‌നെ.

പാട്രിക്ക് സ്റ്റീവാർട്ട്  തൻറെ പ്രൊഫസർ ചാൾസ് എന്ന റോൾ മികച്ചതാക്കി. മറ്റുള്ള ചിത്രങ്ങളിൽ നിന്നും വ്യത്യസ്തമായിരുന്നു അദ്ദേഹത്തിൻറെ കഥാപാത്രം.
കാലിബാൻ ആയി സ്റ്റീഫൻ മെർച്ചൻറ്, ഡൊണാൾഡ് പിയേഴ്സ് ആയി ബോയ്‌ഡ്‌ ഹോൾബ്രുക്, സാണ്ടർ റൈസ് ആയി റിച്ചാർഡ് ഗ്രാന്റും മികച്ച പിന്തുണ നൽകി.

സത്യം പറഞ്ഞാൽ ചിത്രത്തിൽ മുഴുവൻ സമയവും മുഴുകിയിരുന്നതിനാൽ നെഗറ്റിവ് ഒന്നും തന്നെ ശ്രദ്ധിക്കാൻ കഴിഞ്ഞില്ല.

ഒറ്റ വാക്കിൽ പറഞ്ഞാൽ 'Marvel'lous

ഇന്ന് വരെ ഇറങ്ങിയിട്ടുള്ള മികച്ച എക്സ്-മെൻ ചിത്രമായും, മികച്ച മാർവൽ ചിത്രമായും, ഹ്യു ജാക്ക്മാന്റെ മികച്ച ചിത്രമായും,  ജെയിംസ് മാൻഗോൾഡിന്റെ ഏറ്റവും മികച്ച ചിത്രമായും, വൂൾവറീൻ ചിത്രങ്ങളിലെ മികച്ച ചിത്രമായും ലോഗൻ വിശേഷിക്കപ്പെടും എന്നെനിക്കുറപ്പാണ്.

One of the best finale created ever for a legendary character. "Mark my words"

എന്റെ റേറ്റിംഗ് 9.5  ഓൺ 10 (based on my satisfaction)

മാർവൽ മാറ്റത്തിന്റെ പാതയിലാണെന്ന് പറയുന്നത് എത്ര സത്യമാണ്.