205. Doctor Strange (2016)

ഡോക്ടർ സ്‌ട്രേഞ്ച് (2016)

 

Language: English
Genre : Action | Adventure | Fantasy
Director : Scott Derrickson
IMDB : 8.0

Doctor Strange Theatrical Trailer

വളരെക്കാലമായി മാർവലിന്റെ ഡോക്ടർ സ്‌ട്രേഞ്ച് എന്ന ചിത്രത്തിന് വേണ്ടിയിട്ടുള്ള കാത്തിരിപ്പു ഞാൻ തുടങ്ങിയിട്ട്, കാരണം മറ്റൊന്നുമല്ല ഡെഡ്പൂൾ പോലെ ഒരു വ്യത്യസ്തമായ സൂപ്പർ ഹീറോ ആണ് സ്വഭാവത്തിലും വിചിത്രത വെച്ച് പുലർത്തുന്ന ഡോക്ടർ സ്‌ട്രേഞ്ച്. ട്രേയിൽ കണ്ടപ്പോഴും ഞാൻ ഒട്ടും നിരാശനായില്ല കാരണം തീയറ്ററിൽ നിന്നും ഈ ചിത്രം കാണുന്ന ഒരുവന് കൊടുക്കാവുന്നതിന്റെ പരമാവധി ദൃശ്യാനുഭവം കൊടുക്കാനുതകുന്ന ഒന്ന് തന്നെയാണ് പ്രതീക്ഷിച്ചു. അതിനാൽ റിലീസായത്തിന്റെ മൂന്നാമത്തെ ദിവസം തന്നെ കാണുവാൻ തീയറ്ററിൽ കയറി. എന്റെ പ്രതീക്ഷകൾക്ക് വിപരീത ഫലം ഒന്നും നൽകാതെ ഒരു മികച്ച ദൃശ്യാനുഭവം ആക്കി തീർത്തു ഈ ചിത്രം.

സിറ്റിയിലെ ഏറ്റവും മികച്ച ഒരു ന്യൂറോ സർജൻ ആണ് ഡോക്ടർ സ്റ്റീഫൻ സ്‌ട്രേഞ്ച്. എന്നാൽ ഒരു നിമിഷത്തെ തന്റെ ശ്രദ്ധക്കുറവ് മൂലം സംഭവിക്കുന്ന ഒരു ദാരുണ അപകടത്തിൽ അദ്ദേഹത്തിൻറെ കൈകൾക്കുള്ള പൂർണശേഷി നഷ്ടപ്പെടുന്നു. തന്റെ നഷ്ടപ്പെട്ട കഴിവ് തിരിച്ചെടുക്കുവാൻ വേണ്ടി നേപ്പാളിലുള്ള കമർ താജിലേക്കു അദ്ദേഹം പോകുന്നു. പക്ഷെ, അവിടെ അയാൾ പ്രതീക്ഷിച്ചതിനുമപ്പുറമുള്ള ലോകം ആണ് കാണാൻ കഴിയുന്നത്. അവിടെ ഏൻഷ്യന്റ് വൺ എന്ന് വിളിപ്പേരുള്ള ഒരു യോഗി അദ്ദേഹത്തെ തങ്ങളുടെ മായാജാലം പഠിപ്പിക്കുന്നു. സ്‌ട്രേഞ്ചിന്റെ ഈഗോ മാറ്റി വെച്ച്, തങ്ങളുടെ ലോകത്തെ ഇരുട്ടിന്റെ മറവു വരുത്താൻ വരുന്ന മറ്റുള്ള ലോകത്തിൽ നിന്നുള്ള ദുഷ്ട ശക്തികളെ നിഗ്രഹിച്ചു ഭൂമിയെ രക്ഷയ്ക്കുക എന്ന കർത്തവ്യം ഏറ്റെടുക്കുന്നു.

ബെനഡിക്ട് കമ്പർബാച്, ഡോക്ടർ സ്‌ട്രേഞ്ച് ആയി വളരെ മികച്ച അഭിനയം കാഴ്ച വെച്ചു. ഒരേ സമയം തമാശയും സീരിയസ്നസും പതിവ് പോലെ അദ്ദേഹം മികച്ച രീതിയിൽ അവതരിപ്പിച്ചു. ആക്ഷനും നന്നായിരുന്നു (ഡ്യൂപ്പിനെ ഉപയോഗിച്ചിട്ടുണ്ടാവും).
റേച്ചൽ മാക്ആഡംസ് സ്‌ട്രേഞ്ചിന്റെ പ്രേമഭാജനാവും ഡോക്ടറും ആയ ക്രിസ്റ്റീൻ പാൽമറെ അവതരിപ്പിച്ചു. അവർക്കധികം സ്‌ക്രീൻ സ്‌പേസ് കുറവായിരുന്നു. എന്നിരുന്നാലും നന്നായി തന്നെ അഭിനയിച്ചു.
ഏൻഷ്യന്റ് വൺ എന്ന ദുരൂഹത നിറഞ്ഞ യോഗിയായി നല്ല പ്രകടനം കാഴ്ച വെച്ചു റ്റിൽഡാ സ്വിണ്ടൺ. ശിവേട്ടാൽ എജിയോഫോ അവതരിപ്പിച്ച മോർഡോ, ബെനഡിക്ട് വോങ് അവതരിപ്പിച്ച വോങ്, മാഡ്‌സ് മിക്കേൽസാൻ അവതരിപ്പിച്ച നേഗറ്റീവ് കഥാപാത്രം കെസീലിയസ് ഒക്കെ തരക്കേടില്ലാത്ത പ്രകടനം ആയിരുന്നു.

ഒരു വിഷ്വൽ ട്രീറ്റ് എന്നതിലുപരി മറ്റൊന്നും വെച്ചു നീട്ടുന്നില്ല ഈ ചിത്രം. കഴമ്പില്ലാത്ത കഥയും, കഥാപാത്രങ്ങൾക്കൊന്നും ആഴവും ഇല്ലാത്ത ചിത്രത്തിന് സംവിധായകനായ സ്‌കോട്ട് ടെറിക്സൺ വിഷ്വൽ ട്രീറ്റ് എന്ന മൂടുപടം ഇടുകയാണ് ചെയ്തത്. കണ്ണഞ്ചിപ്പിക്കുന്ന ദൃശ്യ വിരുന്നാണ് ശെരിക്കും പറഞ്ഞാൽ ഡോക്ടർ സ്‌ട്രേഞ്ച്. കോമഡിയും ആക്ഷനും മികച്ച രീതിയിൽ സമന്വയിപ്പിച്ചിട്ടുള്ളത് കൊണ്ട് ഒരു സാധാ പ്രേക്ഷകന്റെ മനസ് മൂടിക്കെട്ടാൻ കഴിയും. പക്ഷെ കഥയില്ലായ്മ (ചിലപ്പോൾ ഡോക്ടർ സ്‌ട്രേഞ്ച് എന്ന മാർവൽ സൂപ്പർ ഹീറോയെ അവതരിപ്പിക്കാൻ വേണ്ടിയുള്ള ചവിട്ടു പടിയാകാം ഈ ചിത്രം).നല്ലൊരു പരിധി നമ്മുടെ ആസ്വാദനത്തിന്റെ നിറം കെടുത്തുന്നുണ്ട്. ഇൻസെപ്ഷ്യനൊക്കെ കണ്ടിട്ടുള്ളവർക്കു, നല്ല രീതിയിൽ അതിൽ നിന്നും ആശയം ഉൾക്കൊണ്ടിട്ടുണ്ടാകാം എന്ന് പെട്ടെന്ന് തന്നെ മനസിലാക്കി തരുന്നു. ക്യാമറവർക്കും ഗ്രാഫിക്‌സും ഉജ്വലം തന്നെ (ചിലപ്പോൾ ഗ്രാഫിക്സിനു ഒരു ഓസ്കാർ പ്രതീക്ഷിക്കാം). എന്റെ പ്രിയപ്പെട്ട സംഗീതജ്ഞനായ മൈക്കൽ ജിയാച്ചീനോ ചെയ്ത പശ്ചാത്തല സംഗീതം ചിത്രത്തിനോടിഴ ചേർന്നു നിന്നു. ചിത്രം മുന്നോട്ടു കൊണ്ട് പോകാൻ സംഗീതത്തിന് നല്ല രീതിയിൽ കഴിഞ്ഞു എന്നും പറയാം.

നിങ്ങളെ വിസ്മയിപ്പിക്കുന്ന ഒരു ത്രീഡി വിഷ്വൽ ട്രീറ്റ് കാണണമെന്നാഗ്രഹമുണ്ടെങ്കിൽ അടുത്തുള്ള തീയറ്ററിൽ നിന്നും തന്നെ കാണുക. (വേറെ സംഭവങ്ങൾ ഒന്നും പ്രതീക്ഷിക്കരുത്, ഇതൊരു സൂപ്പർ ഹീറോ ഫാന്റസി ചിത്രം മാത്രമെന്ന് മനസ്സിൽ വെയ്ക്കുക).

എന്റെ റേറ്റിംഗ് : 7.0 ഓൺ 10

മാർവൽ ഫ്രാഞ്ചൈസിയുടെ ലോഗോ ഒക്കെ പുതിയ രീതിയിൽ കൊണ്ട് വന്നു, അത് നന്നായി എനിക്കിഷ്ടപ്പെട്ടു.
ചിത്രം കഴിഞ്ഞു എൻഡ് ക്രെടിട്സ് കൂടെ
മാർവലിന്റെ  മികച്ച ചിത്രങ്ങളുടെ പട്ടികയിലൊന്നും ഈ ചിത്രം ഇടം പിടിക്കുകയില്ല.. എന്നാലും മോശം എന്നൊന്നും പറയാനും കഴിയില്ല.

204. The Magnificent Seven (1960)

ദി മാഗ്നിഫിഷെൻറ് സെവൻ (1960)

Language : English
Genre : Action | Western
Director: Jim Sturges
IMDB : 7.8

The Magnificent Seven Theatrical Trailer

അകിര കുറൊസാവ എന്ന ഇതിഹാസ സംവിധായകൻറെ 1954ൽ ഇതിഹാസ ചലച്ചിത്രകാവ്യമായിരുന്നു സെവൻ സാമുറായി (ശിചിനിൻ നോ സാമുറായി). പ്രമേയം കൊണ്ടും അവതരണം കൊണ്ടും നിരൂപക പ്രശംസയും പ്രേക്ഷക പ്രശംസയും പിടിച്ചു പറ്റിയ ഈ ജാപ്പനീസ് ചിത്രം ബോക്സോഫീസിലും ഒരു കോളിളക്കം സൃഷ്ടിച്ചു. നിരവധി അവാർഡുകളും വാരിക്കൂട്ടുകയും ചെയ്തു. ഈ ചിത്രം ലോകമെമ്പാടുമുള്ള സിനിമാ വ്യവസായത്തിന് ഒരു പുത്തൻ ഉണർവ് നൽകുകയും, പല ഭാഷകളിൽ ഇത് പുനർ നിർമ്മിക്കുകയും ഉണ്ടായി.

അപ്പോൾ പറഞ്ഞു വരുന്നത് മറ്റൊന്നുമല്ല പൂർണമായും സെവൻ സാമുറായിയുടെ റീമേക്ക് ആയിരുന്നു അറുപതിൻറെ തുടക്കത്തിൽ ഇറങ്ങിയ ജോണ് സ്റ്റർഗസ് സംവിധാനം ചെയ്ത ദി മാഗ്നിഫിസൻറ് സെവൻ. സെവൻ സാമുറായി വാളേന്തിയ യോദ്ധാക്കൾ ആയിരുന്നുവെങ്കിൽ ഈ ഹോളിവുഡ് ചിത്രത്തിൽ തോക്കുധാരികളായ വെസ്റ്റേൺ സ്വാധീനമുള്ള ആളുകൾ ആയിരുന്നു.

കൊള്ളക്കാരുടെ തലവനായ കാൽവേറെയും അയാളുടെ കാലാളുകളും നിരന്തരമായി കൃഷിക്കാർ മാത്രമുള്ള മെക്സിക്കൻ ഗ്രാമം നിരന്തരമായി കൊള്ളയടിച്ചു കൊണ്ടിരുന്നു. അവർ ക്രിസ് ആഡംസ് എന്ന തോക്കുധാരിയായ പോരാളിയെ ആ ഗ്രാമവാസികൾ കണ്ടു മുട്ടുകയും അയാളോട് തങ്ങൾക്കു സംഭവിച്ച കാര്യങ്ങൾ എല്ലാം തുറന്നു പറയുന്നു. ഇത് കേട്ട ഉടനെ, ക്രിസ് അവരോടു പറയുന്നു, നിങ്ങൾ കുറച്ചു പോരാളികളെ വാടയ്ക്കെടുത്തു കൊള്ളക്കാരോട് ഏറ്റുമുട്ടാൻ പറയുന്നു. ഗ്രാമവാസികൾ ക്രിസിനോട് തങ്ങളുടെ രക്ഷകൻ ആകാൻ കഴിയുമോ എന്ന് നിർബന്ധിക്കുന്നു. അങ്ങിനെ ക്രിസ് ആ ഗ്രാമത്തിനു രക്ഷകൻ ആകുന്നു. പിന്നീട് ആറു വ്യത്യസ്ത രീതികൾ അവലംബിക്കുന്ന യോദ്ധാക്കളെ ഈ കൃത്യത്തിനായി തന്റെ കൂടെ ചേർത്തു. അവർ കൊള്ളക്കാരുടെ വരവിനായി കാത്തിരിക്കുന്നു. ശേഷം സ്‌ക്രീനിൽ.

ഈ ചിത്രത്തിൽ ഏറ്റവും ആദ്യം പ്രശംസിക്കേണ്ടത് മുഖ്യവില്ലനെ അവതരിപ്പിച്ച ഏലി വല്ലാക്കിനെ ആണ്. അദ്ദേഹത്തിൻറെ കയ്യിൽ കാൽവെര എന്ന കഥാപാത്രം ഭദ്രമായിരുന്നു. വളരെ മികച്ച പ്രകടനം ആണ് അദ്ദേഹം കാഴ്ച വെച്ചത്. ഒരു മികവുറ്റ വില്ലനെ തന്നെ അദ്ദേഹം അവതരിപ്പിച്ചു. നോക്കിലും വാക്കിലും അദ്ദേഹത്തിൻറെ ഡയലോഗ് ഡെലിവറിയിൽ കൂടി പ്രതിഫലിച്ചു. അദ്ദേഹത്തിൻറെ അഭിനയം കാണാനും വേണ്ടി തന്നെ ഉണ്ട്. അത്ര മികവുറ്റ പ്രകടനം.
യൂൾ ബ്രൈന്നർ, ക്രിസ് എന്ന നായക കഥാപാത്രത്തെ അവതരിപ്പിച്ചു. പൊതുവെ ശാന്ത സ്വഭാവം വെച്ച് പുലർത്തുന്ന വികാരങ്ങൾ ഒന്നും മുഖത്തു മിന്നി മറയാത്ത കഥാപാത്രം അദ്ദേഹത്തിന്റെ കയ്യിൽ ഭദ്രമായിരുന്നു എന്ന് പറയാം.
പഴയകാല നായക നടന്മാരിൽ എനിക്കേറ്റവും പ്രിയപ്പെട്ട സ്റ്റീവ് മക്വീൻ ഉപനായകനായ ക്രിസിനെ അവതരിപ്പിച്ചു. നല്ല രസമുണ്ടായിരുന്നു പുള്ളിയുടെ കഥാപാത്രം കാണുവാൻ. അതവതരിപ്പിച്ച രീതിയും നന്നായിരുന്നു.
ചാൾസ് ബ്രോൺസൺ മാഗ്നിഫൈസാൻറ് സെവനിലെ ഒരു നല്ല കഥാപാത്രത്തെ അവതരിപ്പിച്ചു. അദ്ദേഹത്തിനധികം ഒന്നും ചെയ്യാനുണ്ടായിരുന്നില്ല.
മറ്റുള്ളവരെ ഒന്നും അധികം പരിചയമില്ലാത്ത കൊണ്ട് അധികം പ്രതിപാദിക്കുന്നില്ല. എന്നിരുന്നാലും എല്ലാ കലാകാരന്മാറാനും ചിത്രത്തിനാവശ്യമായ രീതിയിൽ തന്നെ തങ്ങളുടെ കഥാപാത്രങ്ങളെ അവതരിപ്പിച്ചു.

നിരവധി ബ്ലോക്ക്ബസ്റ്റർ ചിത്രങ്ങൾക്ക് വേണ്ടി സംഗീതം പകർന്ന എൽമർ ബേൺസ്റ്റീൻ ആണ് ഈ ചിത്രത്തിൻറെ പശ്ചാത്തല സംഗീതം നിർവഹിച്ചത്. വളരെ മികച്ചു തന്നെ നിന്നു.

ഈ ചിത്രത്തിന്റെ കപ്പിത്താൻ എന്നാണു ഞാനീ സിനിമയുടെ സംവിധായകനെ വിശേഷിപ്പിക്കാൻ ആഗ്രഹിക്കുന്നത്. അകിരയുടെ സെവൻ സാമുറായി ഹോളിവുഡിലേക്ക് പറിച്ചു നടുമ്പോഴും, അതിന്റെ കലാമൂല്യം ഒട്ടും തന്നെ ചോർന്നു പോകാതെ ഒരു കൗപോയി രീതിയിലേക്ക് മാറ്റി, മികവുറ്റതാക്കി. നല്ല വേഗതയാർന്ന ആഖ്യാനവും കിടിലൻ ക്യാമറവർക്കും ചിത്രത്തെ ആ കാലഘട്ടത്തിലെ മികച്ച വെസ്‌റ്റേൺ ചിത്രങ്ങളിലൊന്നാക്കി മാറ്റി. പക്ഷെ അമേരിക്കയിൽ ഈ ചിത്രം ഒരു വലിയ ബ്ലോക്ബസ്റ്റർ ആയില്ല എന്നതാണ് വിഷമകരമായ അവസ്ഥ. ഇത്രയും വലിയ കാസ്റ്റും ചിത്രത്തിൻറെ ബജറ്റും പ്രതികൂല കാരണങ്ങളായി എന്നിരുന്നാലും യൂറോപ്പിയൻ രാജ്യങ്ങളിൽ ഈ ചിത്രം വലിയ വിജയവുമായി മാറി.
പിന്നീട് ഈ ചിത്രത്തിന് മൂന്നു ഭാഗങ്ങൾ വന്നെങ്കിലും എല്ലാം ആദ്യത്തേതിന്റെ അത്രയും പോലും വിജയിച്ചില്ല...

അറുപതുകളിൽ ഇറങ്ങിയ ചിത്രമാണെങ്കിലും അവസാന നിമിഷം വരെ നമ്മെ ആകാശയുടെയും ആവേശത്തിന്റെയും മുൾമുനയിൽ നിർത്തുന്ന ഒരു സാഹസിക ചിത്രം.

എന്റെ റേറ്റിങ് : 8.5  ഓൺ 10 

ഭാരതത്തിലെ എക്കാലത്തെയും മികച്ച ചിത്രങ്ങളുടെ കൂട്ടത്തിൽ വരുന്ന ഷോലെ പകർത്തിയെടുത്ത നാല് ചിത്രങ്ങളിലൊന്നാണ് ഈ ചിത്രം.

203. Pulimurugan (2016)

പുലിമുരുഗൻ (2016)

Language : Malayalam
Genre : Action | Drama | Thriller
Director : Vaishakh
IMDB : 8.3

Pulimurugan Theatrical Trailer

കേട്ടറിവിനേക്കാൾ വലുതാണ് മുരുഗൻ എന്ന സത്യം. സിനിമ ഇവിടെ ഗൾഫിൽ റിലീസ് ആകുന്നതിനു മുൻപ് താറടിക്കുന്ന റിവ്യൂ മുതൽ പുകഴ്ത്തി ഉള്ള റിവ്യൂ കണ്ടിട്ടുണ്ട്. അത് കൊണ്ട് കേട്ടറിഞ്ഞ (ഭൂരിഭാഗവും നെഗറ്റീവ് റിവ്യൂ) അഭിപ്രായങ്ങൾ മനസ്സിൽ ഉറപ്പിച്ചു കൊണ്ടാണ് ചിത്രം കാണാൻ ഇന്നലെ തീയറ്ററിൽ കയറിയത്. ഞാൻ താമസിക്കുന്നതിന് എതിർവശത്തായാണ് ഡീർഫീൽഡ്സ് മാൾ, അവിടെയും സിനി റോയൽ മൾട്ടിപ്ലെക്സിൽ ആണ് ഞാൻ സിനിമ കാണുന്നത്. ഒരു സാധാരണ സിറ്റിയിൽ നിന്നും വിട്ടു മാറി അറബികൾ കൂടുതൽ അധിവസിക്കുന്ന എന്റെ സ്ഥലത്തു ഒരു മലയാളം ചിത്രത്തിന് 60-70% ആളുകൾ (അതിൽ അറബികളും തമിഴന്മാരും ഉണ്ട്) നിറഞ്ഞിരിക്കുന്നത് കണ്ടു എനിക്ക് ശരിക്കും അത്ഭുതമായാണ് തോന്നിയത്. ഇതേ തീയറ്ററിൽ കലി എന്ന ചിത്രം കാണുമ്പോൾ വെറും അഞ്ചു പേർ മാത്രമാണുണ്ടായത്.

ചെറുപ്പ കാലത്തു സംഭവിച്ച ദുരന്തം മൂലം നരഭോജികളായ പുലികളോട് ഒരു പ്രത്യേക വൈരം  ആണ് മുരുഗൻ വെച്ച് പുലർത്തുന്നത്. പുലിയൂർ എന്ന ഗ്രാമത്തിനെ പലപ്പോഴായി മുരുഗൻ പുലിയുടെ ആക്രമണത്തിൽ നിന്നും രക്ഷപെടുത്തിയിട്ടുമുണ്ട്. ഒരു തികഞ്ഞ യോദ്ധാവായ പുലിമുരുകന് കാടെല്ലാം ഒരു പാഠപുസ്തകം പോലെ കാണാപാഠമാണ്. തന്റെ അനുജന് പറ്റുന്ന ഒരു അത്യാഹിതവും അതിൻമൂലം ഉണ്ടാകുന്ന അനന്തരഫലം കാരണം പ്രതികാരത്തിനു മുരുകൻ ഇറങ്ങിത്തിരിക്കുന്നതാണ് കഥ.

പുലിമുരുഗൻ എന്ന സിനിമ മോഹൻലാൽ എന്ന നടന്റെ മാസ് പരിവേഷം പരിപൂർണമായി ഉപയോഗിച്ച സിനിമയാണ് പുലിമുരുഗൻ. മോഹൻലാൽ നിറഞ്ഞാടി എന്ന് പറയാം. അദ്ദേഹം ഈ പ്രായത്തിലും തന്റെ കഥാപാത്രത്തിനോട് കാണിക്കുന്ന അഭിനിവേശവും ആത്മാർത്ഥതയും ഒക്കെ ഇന്നത്തെ യുവജനങ്ങൾ കണ്ടു പേടിക്കേണ്ട ഒന്ന് തന്നെയാണ്. ആക്ഷൻ ഒക്കെ നല്ല വൃത്തിയായി തന്നെ ചെയ്തു. ആ മെയ്വഴക്കം പ്രശംസനീയം തന്നെയാണ്. (ചില ആക്ഷൻ സീനുകളിൽ ഡ്യൂപ് ഉപയോഗിച്ചിട്ടുണ്ട് എന്ന കാര്യം മറക്കുന്നില്ല). ചില ആക്ഷൻ സീനുകളിൽ എനിക്ക് വന്ന രോമാഞ്ചം..അത് പറഞ്ഞറിയിക്കാൻ കഴിയുന്നതല്ല.. മൊത്തത്തിൽ ഒരു മോഹൻലാൽ ഷോ തന്നെയായിരുന്നു പുലിമുരുഗൻ.
ഡി ഫോർ ഡാൻസ് ഫെയിം അജാസ് ചെയ്ത മുരുകന്റെ ചെറുപ്പ കാലം ഒരു മികച്ച കാസ്റ്റിംഗ് തന്നെയായിരുന്നു. അജാസ് തൻറെ കഥാപാത്രം നല്ല മികവോടെ തന്നെ അവതരിപ്പിച്ചു.

ലാൽ, ബലരാമൻ എന്ന അമ്മാവൻ കഥാപാത്രത്തിൽ ശരിക്കും നിറഞ്ഞാടി. നല്ല രസമുണ്ടായിരുന്നു അദ്ദേഹത്തിൻറെ റോൾ. കോമഡിയും നല്ല രീതിയിൽ കൈകാര്യം ചെയ്തു.ഈ സിനിമയിൽ എനിക്കേറ്റവും ഇഷ്ടപ്പെട്ട ഒരു റോളിൽ ഒന്നാണ് ലാൽ ചെയ്ത ബലരാമൻ. ബലരാമന്റെ ചെറുപ്പ കാലം ചെയ്ത ആ യുവാവ്.. പേരറിയില്ല. അദ്ദേഹവും കുഴപ്പമില്ലാതെ തന്നെ കൈകാര്യം ചെയ്തു.

എറ്റവും വലിയ കാസ്റ്റിംഗ് അബദ്ധം ആയിരുന്നു ഈ സിനിമയിലെ മൈന എന്ന കഥാപാത്രം. വേട്ടൈയാട് വിളൈയാട് എന്ന ചിത്രത്തിൽ അഭിനയിച്ച കമാലിനി മുഖർജിയെ എനിക്ക് ഭയങ്കര ഇഷ്ടമായിരുന്നു. പക്ഷെ പുലിമുരുകനിലെ അവരുടെ പ്രകടനം കണ്ടു ശരിക്കും മനം മടുത്തു പോയി. ഭയങ്കര ബോർ തന്നെയായിരുന്നു. ഭാവപ്രകടനങ്ങൾ നടത്തുന്നതിലൊക്കെ വലിയ പരാജയവുമായിരുന്നു.

നമിതയുടെ റോൾ അനാവശ്യമായിരുന്നു. അവർക്കു പ്രത്യേകിച്ചൊന്നും ചെയ്യാനുണ്ടായിരുന്നില്ല. വേഷവിധാനവും അല്പം പോരായിരുന്നു. കാടിനോടടുത്തു കിടക്കുന്ന ഒരു ഗ്രാമത്തിൽ ഇങ്ങനെയൊക്കെ വേഷം ചെയ്തു നടക്കുമോ എന്ന സംശയം ബാക്കി കിടക്കുന്നു.

സുരാജ് വെഞ്ഞാറമ്മൂടും നോബിയും കോമഡി കൈകാര്യം ചെയ്തുവെങ്കിലും, ചിരി വരുത്താൻ പാകത്തിനുള്ള മരുന്ന് രണ്ടു പേരുടെയും ഇടയിൽ അന്യം നിന്നിരുന്നു. അതിലും കൂടുതൽ കോമഡി ലാലിന്റെ കഥാപാത്രത്തിൽ നിന്നും ഉണ്ടായിരുന്നു.

ജഗപതി ബാബു, കിഷോർ, സുധീർ കരമന, വിനു മോഹൻ, അഞ്ജലി അനീഷ്, എംഎസ് ഗോപകുമാർ, ബാല, തുടങ്ങിയ നീണ്ട നിര തന്നെ ചിത്രത്തിൽ ഉണ്ട്. ഇവരിലൊക്കെ അല്പമെങ്കിലും മനസ്സിൽ താങ്ങി നിൽക്കുന്ന കഥാപാത്രങ്ങൾ നന്ദു അവതരിപ്പിച്ച റേഞ്ചർ ദിവാകരനും, ബാല അവതരിപ്പിച്ച ശിവ എന്ന കഥാപാത്രവുമാണ്. വിനു മോഹൻ തന്റെ നിഷ്കളങ്ക റോൾ ചെയ്തു എന്ന് പറഞ്ഞാലും അല്പം ഓവർ ആയി പോയി.

അന്യഭാഷയിൽ നിന്നും നിരവധി പേര് ഈ ചിത്രത്തിൽ അഭിനയിച്ചത് ചിലപ്പോൾ പുലിമുരുകന്റെ ഡബ്ബിങ് വേര്ഷന് മൈലേജ് കൂട്ടാനാണെന്നുറപ്പ്.

മോഹൻലാൽ എന്ന നടനൊപ്പം എന്ന പോലെ അല്ലെങ്കിൽ ഈ സിനിമയ്ക്ക് മറ്റൊരു മുതൽക്കൂട്ടാകുന്നതു ഗോപി സുന്ദറിന്റെ പശ്ചാത്തല സംഗീതം തന്നെയാണ്. വളരെയധികം യോജിച്ചു നിൽക്കുന്നുണ്ടായിരുന്നു. തുടക്കം മുതൽ ഒരു മാസ് സിനിമയുടെ ഓളം നിലനിർത്താൻ അദ്ദേഹത്തിൻറെ സംഗീതത്തിന് കഴിഞ്ഞു. എന്നാൽ ഇടയിൽ അദ്ദേഹത്തിൻറെ തന്നെ സംഗീതത്തിന്റെ പിന്തുടർച്ച കേൾക്കാൻ കഴിഞ്ഞത് അല്പം അലോസരം ആയി.

പീറ്റർ ഹെയിൻറെ ആക്ഷൻ മികച്ചു നിന്നു. പുതുമയുള്ള കൊറിയോഗ്രാഫി ഒന്നുമല്ലെങ്കിലും മോഹൻലാൽ എന്ന നടൻ ഇങ്ങനെ ചെയ്യുന്നത് കൊണ്ട് പുതുമ തോന്നിപ്പിച്ചു. കുറച്ചൊക്കെ അവിശ്വസനീയം ആയ ഫൈറ്റ് ഉണ്ടായിരുന്നെങ്കിലും ഫിനാലെ ആക്ഷനും കിഷോറുമായുള്ള ആക്ഷനും മികച്ചു നിന്നു.

ഗ്രാഫിക്സ് എല്ലാം മികച്ചു നിന്നു. ഇത്രയും ചെറിയ ബജറ്റിൽ ഇത്രയധികം പെർഫെക്ഷനോട് പുലിയെയും മറ്റും അവതരിപ്പിക്കാൻ കഴിഞ്ഞത്, ടെക്നിക്കൽ ക്രൂവിന്റെ മിടുക്കു തന്നെയാണ്. (ബ്രഹ്മാണ്ഡ പടമായ ബാഹുബലിയിലെ കാള എന്ത് പോരായിരുന്നു എന്ന് കണ്ടവർക്കെല്ലാം അറിയാമല്ലോ).

ക്യാമറവർക് വളരെയധികം മികച്ചു നിന്നു. കാടിന്റെയും ഗ്രാമത്തിന്റെയും മനോഹാരിത മികച്ച രീതിയിൽ ഒപ്പിയെടുത്തിട്ടുണ്ട്. ഒരു നിമിഷം മുരുഗൻ താമസിക്കുന്ന വീട്ടിൽ താമസിച്ചാൽ കൊള്ളാമെന്നൊരു ആശയുണ്ടായി എന്റെ മനസ്സിൽ.. ഷാജി കുമാർ ആയിരുന്നു ക്യാമറാമാൻ.

ചിത്രത്തിൻറെ ഏറ്റവും വലിയ പോരായ്മ എന്ന് പറഞ്ഞാൽ പൊള്ളയായ, കണ്ടു മടുത്ത കഥയാണ്. പിന്നെ ഒരു മാസ് ചിത്രത്തിന് വലിയ കഥ ഒന്നും ആവശ്യപ്പെടുന്നില്ലല്ലോ എന്ന ഒരു ആശ്വാസം ഉണ്ട്.
സ്ഥിരം പാറ്റേണിലുള്ള കഥ ഉദയകൃഷ്ണയുടേതാണ്. ഉദയകൃഷ്ണയ്ക്കു ഒരു കണക്കിന് പറഞ്ഞാൽ അഭിമാനിക്കാം, തന്റെ കഥ വെച്ച് മലയാളത്തിലെ സർവകാല റെക്കോർഡും ഈ ചിത്രം ഭേദിച്ചു എന്നതിൽ.
എഡിറ്റിങ് വളരെ മോശം ആയിരുന്നു പുലിമുരുഗന്റെതു. ജോൺകുട്ടിയുടെ എഡിറ്റിങ് പരിതാപകരമായിരുന്നു. നിരവധി സീനുകൾ ഒഴിവാക്കി ഒരു 25 മിനുട്ട് കുറച്ചിരുന്നുവെങ്കിൽ ചിത്രം ഇതിലും ആസ്വാദ്യകരമായേനെ. വിവേക് ഹർഷൻ, ശ്രീകാർപ്രസാദ് എന്നിവരെ ഈ അവസരത്തിൽ ഓർത്ത് പോകുന്നു. വളരെ അധികം നീല കൂടുതലും നല്ല ലാഗും തോന്നി ചിത്രത്തിന്.

ഒരു സാധാരണ സ്ക്രിപ്റ്റും കൊണ്ടാണ് ഇത്രയും വലിയ ബജറ്റിൽ സിനിമ സംവിധാനം ചെയ്യാനിറങ്ങിയ വൈശാഖിനെ ഞാൻ ആദ്യമേ തന്നെ അഭിനന്ദിക്കുന്നു. സ്ക്രിപ്റ്റിലെ പോരായ്മ, മോഹൻലാൽ എന്ന നായകനിൽ ഉള്ള വിശ്വാസം ആകാം ഇതിനു ചിലപ്പോൾ കാരണം. എന്നിരുന്നാലും വൈശാഖ് തന്നിൽ നിർമ്മാതാവ് ഏൽപ്പിച്ച ജോലി വളരെ ഭംഗിയായി ചെയ്തു എന്ന് പറയാൻ കഴിയും. സ്ക്രിപ്റ്റിലെ ന്യൂനതയും ചില ഭാഗങ്ങളിൽ നൽകുന്ന വിരസതയും ഒഴിച്ച് നിർത്തിയാൽ നല്ല ഒരു മാസ് ചിത്രം തന്നെ സൃഷ്ടിച്ചു വൈശാഖ്. ഒരു സംവിധായകൻ എന്ന നിലയ്ക്ക് വെറും ചില്ലറകാര്യവുമല്ല അത്.

സത്യം പറഞ്ഞാൽ ചിത്രം കണ്ടു കഴിഞ്ഞപ്പോൾ നൂറു കോടി ഒക്കെ ഈ പടത്തിനു അർഹമാണോ എന്ന ഒരു ചോദ്യം മനസിലുയർന്നു. പിന്നെ, ഇതിലും വളരെ മോശമായ പടങ്ങൾ തമിഴിലും തെലുങ്കിലും ഹിന്ദിയിലും ഒക്കെ 100 കോടിയുടെ മേൽ കിട്ടുന്നില്ലേ. അങ്ങിനെ വെച്ച് നോക്കിയാൽ അമ്മാതിരി പടങ്ങളിലും മേലെ നിൽക്കുന്നുണ്ട് നമ്മുടെ മലയാള സിനിമയുടെ പരിമിതിയിൽ നിന്നും പുറത്തു വന്ന പുലിമുരുഗൻ എന്ന ചിത്രം.

മലയാളത്തിന് അഭിമാനിക്കാം, നമ്മുടെ സിനിമാ വ്യവസായത്തിൽ നിന്നും ഒരു സിനിമ നൂറു കോടി ക്ലബ്ബിൽ കയറി എന്നത്.

ന്യൂനതകളും കുറവുകളും നിരവധി ഉണ്ടെങ്കിലും ഒരു തവണ അൽപസ്വല്പം വിരസത ഇടയ്ക്കു കയറി വരുമെങ്കിലും ആസ്വദിച്ചു കാണുവാൻ കഴിയുന്ന ഒരുത്സവകാല മാസ് ചിത്രം തന്നെയാണ് പുലിമുരുഗൻ. ഇത് ചിലപ്പോൾ ചെറിയ സ്‌ക്രീനിൽ കാണുമ്പോൾ ഒരിക്കലും ആ ഫീൽ തരികയുമില്ല...

എന്റെ റേറ്റിങ് 07.1 ഓൺ 10

ഇനിയും നല്ല ചിത്രങ്ങൾ വരട്ടെ, കാശ് മുടക്കി കാണുന്ന പ്രേക്ഷകനെ ആഹ്ലാദിപ്പിക്കാനും ചിന്തിപ്പിക്കാനും കഴിയുന്ന നല്ല കാമ്പുള്ള ചിത്രങ്ങൾ. ചിത്രങ്ങൾ നിർമ്മിച്ചാൽ മാത്രം പോരാ, അത് കൂടുതൽ ജനങ്ങളിൽ എത്തിക്കാൻ കഴിഞ്ഞാലേ വിജയവും നേടാൻ കഴിയൂ. ഒരു സാധാരണ  കഥയുള്ള ചിത്രമായ പുലിമുരുകന് ബോക്സോഫീസ് കാൽക്കീഴിലാക്കാൻ കഴിയുമെങ്കിലും, നല്ല മാർക്കറ്റിങ് ഉണ്ടെങ്കിൽ, നല്ല ചിത്രങ്ങൾ വിജയം കൊയ്യാൻ കഴിയും.

202. Kraftidioten (In Order Of Disappearance) (2014)

ക്രാഫ്റ്റിഡയോടെൻ (ഇൻ ഓർഡർ ഓഫ് ഡിസപ്പിയറൻസ്) (2014)

Language : Norwegian
Genre : Action | Comedy | Crime | Thriller
Director : Hasn Petter Moland
IMDB : 7.2

In Order of Disappearance Theatrical Trailer

നീൽസ് ഡിക്ക്മാൻ, നോർവേയിൽ ഒരു ഗ്രാമത്തിലെ മഞ്ഞുകോരൽ ബിസിനസ് നടത്തുന്ന ഒരു വയോവൃദ്ധനാണ്.ഭാര്യയുമൊത്താണ് താമസം. തൻറെ സേവനത്തിനു രാജ്യ മികച്ച പൗരൻ എന്നുള്ള ബഹുമതി വരെ കൊടുത്ത് അദ്ദേഹത്തെ ആദരിച്ചു. ഒരു ദിവസം തൻറെ ഒരേയൊരു മകൻ കൊല്ലപ്പെട്ടതായി വിവരം ലഭിക്കുന്നു. അമിതമായി മയക്കുമരുന്നുപയോഗിച്ചതാണ് മരണകാരണമെന്ന് പോലീസ് ഭാഷ്യം. എന്നാൽ തൻറെ മകൻ മയക്കുമരുന്നുപയോഗിക്കില്ല എന്നുറപ്പുള്ള നിൽസ് ആകെ തകരുന്നു. മനോവിഷമം കാരണം ആത്മഹത്യയ്ക്ക് പോലും തയാറാകുന്ന നിൽസ് തൻറെ മകനെ ഒരു ഗാങ്ങ്സ്റ്റർ സംഘം ആണ് കൊലപ്പെടുത്തിയതെന്നും അറിയുന്നു. തൻറെ മകനെ വകവരുത്തിയവർക്കെതിരെ പ്രതികാരം ചെയ്യാനിറങ്ങുന്നതാണ് മൂല കഥ. തൻറെ പ്രതികാരം സഫലീകരിക്കാനാവുമോ എന്നാവരണം ചെയ്യുന്നതാണ് ഇൻ ഓർഡർ ഓഫ് ഡിസപ്പിയറൻസ് എന്ന് ആംഗലേയ നാമമുള്ള ഈ നോർവീജിയൻ ചിത്രം.

ക്ളീഷേകൾ നിരവധി ആണെങ്കിലും മികച്ച രീതിയിൽ തന്നെ ആണ് ചിത്രത്തിൻറെ ആഖ്യാനം. ബ്ളാക്ക് കോമഡി ത്രില്ലർ എന്ന ഗണത്തിൽ നല്ല ഒരു ഉദാഹരണം കൂടിയാണീ ചിത്രം. സീരിയസ് കഥാഖ്യാനം ആണെങ്കിലും ചിരിക്കാനുതകുന്ന കോമഡികൾ കൊണ്ട് സമ്പന്നമാണ്. ഒരു നിമിഷം പോലും നമുക്ക് മുഷിപ്പ് നേരിടേണ്ടി വരികയില്ല എന്നത് സാരം. കിം ഫ്യൂപ്സ് ആകേസൻ എഴുതിയ കഥ സംവിധാനം ചെയ്തിരിക്കുന്നത് ഹാൻസ് പീറ്റർ മോലാൻഡ് ആണ്. അദ്ദേഹം ഈ പ്രതികാര കഥയ്ക്ക് ഒരു കിൽബിൽ പിന്നെ ഫാർഗോ ശൈലിയിലുള്ള ട്രീറ്റ്മെന്റ് ആണ് നൽകിയിരിക്കുന്നത്. അതി കൊടൂരാമായ രക്തചിന്തലും ആക്ഷനും എല്ലാം സമന്വയിപ്പിച്ചെടുത്തിരിക്കുന്നതു. പ്രത്യേകം എടുത്തു പറയേണ്ട വിഭാഗങ്ങൾ സംഭാഷണ ശകലങ്ങൾ, ക്യാമറവർക്ക്, നല്ല പശ്ചാത്തല സംഗീതം. ഈ മൂന്നു വിഭാഗങ്ങൾ ചിത്രത്തിന് നൽകിയ സഹായം ചില്ലറയല്ല.

കേന്ദ്ര കഥാപാത്രമായ നിൽസ് ഡിക്കൻസനെ അവതരിപ്പിച്ച സ്റ്റെല്ലാർ സ്കാർസ്ഗാർഡ് പ്രത്യേക അഭിനന്ദനം അർഹിക്കുന്നുണ്ട്. അദ്ദേഹം ഒരു പെർഫെക്ട് കാസ്റ് ആയി തോന്നി. അദ്ദേഹത്ത്തിന്റെ എപ്പോഴും ശാന്തത കൊണ്ടാടുന്ന അല്ലെങ്കിൽ മ്ലാനമായ മുഖം, ആ കഥാപാത്രത്തിന് ആവശ്യകത ഉള്ളതുമായിരുന്നു. വില്ലനായി അഭിനയിച്ച ആൾ (പാൽ  സ്വീർ ഹാകൻ) തരക്കേടില്ലായിരുന്നു. എല്ലാ നടീനടന്മാരും തങ്ങളുടെ ജോലി കിറുകൃത്യമായി തന്നെ ചെയ്തു.

എനിക്കിഷ്ടായി ഈ ഡാർക് കോമഡി റിവഞ്ച് ത്രില്ലർ. നിങ്ങളും ഒന്ന് കാണാൻ ശ്രമിച്ചു നോക്കണം.

എൻറെ റേറ്റിങ് 8.1 ഓൺ 10

201. The Accountant (2016)

ദി അക്കൗണ്ടൻറ് (2016)

Language : English

Genre : Action | Crime | Thriller

Director : Gavin O' Connor

IMDB : 7.7

The Accountant Theatrical Trailer

ക്രിസ്റ്റൻ വൂൾഫ്, ഓട്ടിസം ബാധിച്ച ഗണിതരാക്ഷസനാണ്. ഒരു മിലിട്ടറി കുടുംബത്തിൽ ജനിച്ചു വളർന്ന ക്രിസ്, ആയുധങ്ങളും അടിതടകളിലും അഗ്രഗണ്യൻ ആണ്. ഒരു സാധാരണ അക്കൗണ്ടൻറ് ആയി അദ്ദേഹം ഇല്ലിനോയിൽ ജോലി നോക്കുന്നു. എന്നാൽ വലിയ കമ്പനികളുടെ പണമിടപാടുകളിൽ ക്രമക്കേട് കണ്ടെത്തുമ്പോൾ ക്രിസിനെയാണ് കൂടുതലും അവർ ആശ്രയിക്കുക. ഒരു വാടകക്കൊലയാളി ആകാനും ക്രിസ്സിന് മടിയില്ല. ലിവിങ് റോബോട്ടിക്സ് എന്ന കമ്പനിയിലെ  ക്രമക്കേടുകൾ ഡാന എന്ന ജൂനിയർ അക്കൗണ്ടന്റ് കണ്ടു പിടിച്ചതിനെ തുടർന്ന് ക്രിസ്റ്റിനെ അവിടുത്തെ ഓഡിറ്റിന്റെ ചുമതലയേൽപ്പിക്കുന്നു.  കമ്പനിയുമായിട്ടു ബന്ധപ്പെട്ടവർ കൊല്ലപ്പെടുകയും രണ്ടു പേരുടെയും ജീവനും തന്നെ പ്രശ്‌നമാകുന്നു. 

ആരാണ് അവരെ കൊല്ലാൻ തുനിയുന്നത്? എങ്ങിനെയാണ് കമ്പനിയുടെ വരവ് ചെലവുകളിൽ ക്രമക്കേട് വരുന്നത്? ഇതിനൊക്കെ അറുതി ക്രിസ് എങ്ങിനെ വരുത്തും എന്നതിന് ചിത്രം തുടർന്ന് തന്നെ കാണുക വേണം.

എന്നെ സംബന്ധിച്ചിടത്തോളം പരിപൂർണ സംതൃപ്തി നൽകിയ ഒരു ചിത്രമാണ് ദി അക്കൗണ്ടന്റ്.  കഥ, തിരക്കഥ, സംവിധാനം, എഡിറ്റിങ്, ബാക്ക്ഗ്രൗണ്ട് സ്‌കോർ, ആക്ഷൻ കൊറിയോഗ്രാഫി എന്നീ നിലകളിൽ യാതൊരു കുറവും കണ്ടെത്താൻ കഴിഞ്ഞില്ല.വാരിയർ, മിറാക്കിൾ എന്ന ചിത്രങ്ങൾ സംവിധാനം ചെയ്ത ഗവിൻ വളരെ മികച്ച രീതിയിലും നല്ല വേഗതയാർന്ന രീതിയിലും അവതരിപ്പിച്ചു. ബിൽ ടുബുക്ക് ആണ് കഥ എഴുതിയിരിക്കുന്നത്. നല്ല കിടിലൻ ആക്ഷൻ കൊറിയോ തന്നെയാണ് ഈ ചിത്രത്തിൻറെ ഹൈലൈറ്റ്. രക്തക്കചൊറിച്ചിലും അല്പം കൂടുതൽ തന്നെയായിരുന്നു. അൽപ സ്വല്പം ക്ളീഷേ ഉണ്ടെങ്കിലും, നമുക്കതു തോന്നാത്ത രീതിയിൽ തന്നെ അവതരിപ്പിച്ചു. 

ബെൻ അഫ്‌ളക്‌ തന്റെ കഥാപാത്രത്തോട് നീതി പുലർത്തി. എമ്മാതിരി  സ്‌ക്രീൻ പ്രസൻസ് ആണ് അദ്ദേഹത്തിന്. ആക്ഷനിലും അദ്ദേഹം മികച്ചു നിന്നു. ഡയലോഗ് പറയുന്നതും തന്റെ ശരീരഭാഷയും എല്ലാം ഒരു ഹൈ ലെവൽ ഓട്ടിസ്റ്റിക് രോഗിയുടെ പരിവേഷം നൽകി.

ജോൺ ബ്രെന്താൽ നല്ല ഒരു കിടിലൻ വേഷം അവതരിപ്പിച്ചു. അദ്ദേഹം നല്ല രീതിയിൽ ഒരു വാടകകൊലയാളിയുടെ വേഷം ചെയ്തു. ആക്ഷനിലുപരി അല്പം സെന്റിമെന്റ്സ് ആണ് അദ്ദേഹം നല്ല രീതിയിൽ ചെയ്തത് എന്ന് തോന്നി.

അന്ന കെൻഡ്രിക്, ഒരു സുപ്രധാന റോൾ അവതരിപ്പിച്ചെങ്കിലും സ്‌ക്രീൻ സ്‌പേസ് കുറവായിരുന്നു. എന്നാലും നന്നായി തന്നെ ചെയ്തു. എനിക്കിപ്പോഴും ആ പഴയ അന്ന കേന്ദ്രിക്കിനെ ആണിഷ്ടം. സൈസ് സീറോയിലേക്കുള്ള കുതിപ്പാണെന്നു തോന്നുന്നു. ആ മുഖത്തെ ഐശ്വര്യം അങ്ങ് കുറഞ്ഞ പോലെ തോന്നി.

ജെ.കെ. സിമൻസ് ഒരു സുപ്രധാന റോൾ തന്റേതായ രീതിയിൽ ചെയ്തു. 

മൊത്തത്തിൽ പറഞ്ഞാൽ എനിക്ക് വളരെയധികം ഇഷ്ടപ്പെട്ടു ഈ ചിത്രം. നല്ല ഒരു ആക്ഷൻ ത്രില്ലർ.

എൻറെ റേറ്റിംഗ് 9.2 ഓൺ 10

200. Kodi (2016)

കൊടി (2016)

 

Language : Tamil
Genre : Action | Drama | Romance | Thriller
Director : R.S. Durai Senthilkumar
IMDB : 7.6

Kodi Theatrical Trailer

കൊടിയ്ക്കു പാർട്ടിയെന്നു വെച്ചാൽ ജീവനാണു.. സത്യസന്ധമായ നയങ്ങളും വീക്ഷണങ്ങളുമുള്ള കൊടി കുഞ്ഞുന്നാൾ മുതൽക്ക്‌ തന്നെ പാർട്ടി എന്നുള്ള മന്ത്രം മാത്രമാണു ഉരുവിടുന്നത്‌. കൊടിയുടെ ഇരട്ട സഹോദരൻ കോളേജ്‌ പ്രഫസർ ആയ അൻബും അമ്മയുമൊത്താണു താമസം. കളിക്കൂട്ടുകാരിയും എതിർ പാർട്ടിയിൽ പ്രവർത്തിക്കുന്ന രുദ്ര ആണു കൊടിയുടെ പ്രണയിനി. അൻബുവിന്റെ സഖിയായി മാലതിയും. തന്റെ പട്ടണത്തിൽ ഉള്ള ഒരു ഫാക്റ്ററിയിൽ നിന്നും പുറന്തള്ളുന്ന മെർക്കുറി മൂലം അവിടുത്തെ ജനങ്ങളുടെ ആരൊഗ്യം തകരാറിലാകുന്നതു മൂലം അതിനെതിരെ പോരാടുന്ന കൊടിയുടെ കഥ ആണു ചിത്രം അനാവരണം ചെയ്തിരിക്കുന്നത്‌. 

തങ്കമഗൻ തൊടരി എന്ന രണ്ടു ബോക്സോഫീസ്‌ ദുരന്തങ്ങൾക്കു ശേഷം ആർ.എസ്‌. സെന്തിൽകുമാറുമായിട്ടു ധനുഷ്‌ കൈകോർത്തിരിക്കുന്ന ചിത്രമാണു കൊടി. പൂർണ്ണാമായും ഒരു രാഷ്ട്രീയ പശ്ചാത്തലത്തിൽ കഥ പറഞ്ഞിരുക്കുന്ന ഈ ചിത്രത്തിൽ പ്രണയവും, ചതിയും, കോമഡിയും, ആക്ഷനും എല്ലാം കൃത്യമായി മിശ്രണം ചെയ്തിരിക്കുന്നു. ധനുഷിനെ കൂടാതെ ത്രിഷ, ശരണ്യ, എസ്‌.എ. ചന്ദ്രശേഖർ, അനുപമ പരമേശ്വരൻ, കരുണാസ്‌ തുടങ്ങിയവർ മുഖ്യ കഥാപാത്രങ്ങളെ അവതരിപ്പിച്ചിരിക്കുന്നു. സന്തോഷ്‌ നാരായണൻ സംഗീതവും പശ്ചാത്തല സംഗീതവും നിർവഹിച്ചിരിക്കുന്നു.

ധനുഷ്‌ തന്റെ രണ്ടു റോളുകളിലും തകർത്താടി.. നല്ല സ്ക്രീൻ പ്രസൻസ്‌ ഉണ്ടായിരുന്നു ധനുഷിനു ചിത്രത്തിലാകമാനം. ധനുഷിന്റെ അഭിനയ റേഞ്ചിനടുത്തൊന്നുമെത്തില്ലെങ്കിലും ഒട്ടും മുഷിയാതെ തന്നെ അദ്ദേഹം തന്റെ കഥാപാത്രങ്ങളെ അവതരിപ്പിച്ചു.

ത്രിഷ അവതരിപ്പിച്ച രുദ്ര എന്ന കഥാപാത്രം, അവരുടെ കരീറിലെ മികച്ചതും ശക്തവുമായതാണു. അതു അവർ വളരെ മികച്ച രീതിയിൽ തന്നെ വെള്ളിത്തിരയിൽ അവതരിപ്പിച്ചു. പക്ഷെ എന്റെ അഭിപ്രായത്തിൽ ത്രിഷ തന്നെ ആ കഥാപാത്രത്തിനു ശബ്ദം നൽകിയിരുന്നുവെങ്കിൽ ഇതിലും മികച്ചതാക്കാമായിരുന്നു.. കാരണം മുഖത്തു വന്ന ഭാവങ്ങൾക്കു പറ്റിയ ഒരു ഡബ്ബിംഗ്‌ അല്ലായിരുന്നു. ത്രിഷ വളരെ സുന്ദരിയായി തന്നെ കാണപ്പെട്ടു.

അനുപമ പരമേശ്വരൻ എന്നെ ശരിക്കും അതിശയിപ്പിച്ചു കളഞ്ഞു. പ്രേമത്തിനു ശേഷം ഈ ചിതത്തിലാണു അവരെ കാണുന്നത്‌. ഒരു പുതുമുഖ നടിയെന്ന സങ്കോചം ഒന്നുമില്ലാതെ മാലതിയെന്ന കഥാപാത്രത്തെ അവർ തന്മയത്തോടെ അഭിനയിച്ചു..

വിജയുടെ അച്ചൻ ആയ എസ്‌.എ. ചന്ദ്രശേഖർ നല്ല ഒരു റോൾ ചെയ്തിട്ടുണ്ടു. തമിഴിന്റെ സ്ഥിരം അമ്മയായ ശരണ്യ, കാളി വെങ്കട്ട്‌, മാരിമുത്തു എന്നിവർ അവരുടെ കഥാപാത്രങ്ങൾക്കൊത്ത അഭിനയം കാഴ്ച വെച്ചു. കരുണാസ്‌ ചെറിയ റോൾ ആയിരുന്നുവെങ്കിലും ആ കഥാപാത്രം കഥയ്ക്‌ക്ക്‌ നൽകിയ മൈലേജ്‌ മറക്കാൻ കഴിയില്ല.

ദുരൈ എന്ന സംവിധായകന്റെ കഴിവു ഈ ചിത്രത്തിൽ തീർത്തും കാണാൻ കഴിയും. അധികം സമയം കഥാപാത്ര നിർമ്മിതിയ്ക്കു വേണ്ടി ചിലവാക്കാതെ തന്നെ പെട്ടെന്നു തന്നെ പ്രേക്ഷകനിൽ രെജിസ്റ്റർ ചെയ്യിക്കാൻ കഴിഞ്ഞു. ഓരോ കഥാപാത്രങ്ങൾക്കും ഈ ചിത്രതിൽ വ്യക്തിത്വമുണ്ടായിരുന്നു എന്നതും ഒരു പ്ലസ്‌ പോയിന്റാണു. കഥാഖ്യാനവും മികച്ചു നിന്നു.. ആദ്യ പകുതിയിൽ കോമഡിയ്ക്കും പ്രണയത്തിനും അൽപം ആക്ഷനും പ്രാധാന്യം കൊടുത്തെങ്കിൽ രണ്ടാം പകുതി രാഷ്ട്രീയത്തിനും പ്രതികാരത്തിനുമാണു ഊന്നൽ നൽകിയതു.

കൊടിയെന്ന ചിത്രത്തിന്റെ ജീവനാഡി സന്തോഷ്‌ നാരായണൻ ആണു. കാഷ്മോരയിലെ മോശം പ്രകടനം ആയിരുന്നുവെങ്കിൽ ഈ ചിത്രത്തിൽ അദ്ദേഹം നിറഞ്ഞാടി. കഥയും സന്ദർഭവും എന്താവശ്യപ്പെടുന്നുവോ അതിനനുസരിച്ചുള്ള പശ്ചാത്തല സംഗീതം. മൂന്നു ഗാനങ്ങൾ മികച്ചു നിന്നു.

സാധാരണയായ ക്യാമറാവർക്ക്‌ ആവശ്യപ്പെട്ട ചിത്രത്തിൽ തരക്കേടില്ലാതെ തന്നെ ക്യാമറ വെങ്കിടേഷ്‌ കൈകാര്യം ചെയ്തു. പ്രകാശ്‌ മബ്ബുവിന്റെ ചിത്രസംയോജനവും മികച്ചു നിന്നു. ആക്ഷൻ കൊറിയോ ചെയ്ത ആളുടെ പേരെന്താണെന്നറിയില്ല എന്നിരുന്നാലും വിശ്വാസ്യത തോന്നുന്ന ഫൈറ്റായിരുന്നു ചിത്രത്തിലുൾപ്പെടുത്തിയിരുന്നത്‌.

മൊത്തത്തിൽ പറഞ്ഞാൽ ഈ ദീപാവലി വെടിക്കെട്ടു കൊടി തന്നെയാണു. വളരെ നല്ല ഒരു പൊളിറ്റിക്കൽ ത്രില്ലർ. ത്രിഷയുടെ കഥാപാത്രം എന്നാളും ഓർമ്മ നിലനിൽക്കും.

എന്റെ റേറ്റിംഗ്‌ 7.3 ഓൺ 10

199. Jack Reacher: Never Go Back (2016)

ജാക്ക് റീച്ചർ 2 നെവർ ഗോ ബാക്ക് (2016)

Language: English

Genre : Action | Mystery | Thriller

Director: Edward Zwick

IMDB : 6.4

Jack Reacher Never Go Back Theatrical Trailer

മിലിട്ടറിയിൽ നിന്നും വിരമിച്ച ജാക്ക് റീച്ചർ നാലു വർഷങ്ങൾക്കു ശേഷം ഹെഡ്ക്വാർട്ടറിൽ ഉള്ള തന്റെ ഫോൺ സുഹൃത്ത് സൂസൻടർണറിനെ കാണുവാൻ വേണ്ടി പോകുന്നു. അവിടെ ചെല്ലുമ്പോഴാണ് ജാക് അറിയുന്നത്, സൂസനെ ചാരപ്രവർത്തി ചെയ്തതിനുരാജ്യദ്രോഹക്കുറ്റം ചുമത്തി ജയിലിലടച്ചിരിക്കുകയാണ് എന്ന്. ഇതിൽ എന്തോ പന്തികേട് തോന്നി, സൂസൻറെ വക്കീലിനെ കണ്ടു കാര്യങ്ങൾഅറിയുന്നു. തന്റെ മകളെന്ന് അവകാശപ്പെടുന്ന കുട്ടിയേയും സൂസനെയും രക്ഷിക്കുക എന്ന ദൗത്യം ആണിത്തവണ ജാക്ക് റീച്ചർഏറ്റെടുക്കുന്നത്.

ടോം ക്രൂസ് തന്നെയാണ് ഈ ചിത്രത്തിലെയും ആകർഷണം. അദ്ദേഹത്തിൻറെ സ്‌ക്രീൻ പ്രസൻസ് പറഞ്ഞറിയിക്കാൻ കഴിയില്ല, അത്രയ്ക്കുംമികച്ച  ലുക്ക് ആണ്. പക്ഷെ പ്രായം മുഖത്ത് വിളിച്ചറിയിക്കുന്നുമുണ്ട്. എന്നിരുന്നാലും ഈ പ്രായത്തിലും കാണിക്കുന്ന ആ ഉത്സാഹംഅല്ലെങ്കിൽ സ്പിരിറ്റ് സമ്മതിച്ചു കൊടുത്തേ മതിയാകൂ. ആക്ഷനിലും അഭിനയത്തിലും മികച്ചു തന്നെ നിന്നു. ജാക്കിന്റെ അത്രയും തന്നെപ്രാധാന്യം ഉള്ള കഥാപാത്രം ആണ് മേജർ സൂസൻ ടർണർ, അവരെ അവതരിപ്പിച്ചത് സുന്ദരിയായ കോബി സ്മാൾഡേഴ്സ് ആണ്. അഭിനയത്തിലുംആക്ഷനിലും അവർ മുന്തിയ പ്രകടനം കാഴ്ച വെച്ചു. സാമന്ത എന്ന കഥാപാത്രത്തെ അവതരിപ്പിച്ച ഡാനിക യറോഷ് നല്ല അസ്സല് വെറുപ്പീര്ആയിരുന്നു. വില്ലന്മാർക്കൊന്നും ഒരു എനർജി ഇല്ലായിരുന്നു ഈ ചിത്രത്തിൽ. എന്തോ!!! നല്ല പോരായ്മ തോന്നി..

ചിത്രത്തിന് തരക്കേടില്ലാത്ത ഒരു കഥയുണ്ടായിരുന്നു, പക്ഷെ എഡ്‌വേഡ്‌ സ്‌വിക്ക് എന്ന മാസ്മരിക സംവിധായകന് ഈ ചിത്രം എടുത്തതിൽനല്ല പിഴവാണ് സംഭവിച്ചിരിക്കുന്നത്. ദി ലാസ്‌റ് സാമുറായിയും ഡെഫിയൻസും ബ്ലഡ് ഡയമണ്ടും ഒക്കെ എടുത്ത സംവിധായകൻതന്നെയാണോ എന്നൊരു നമ്മൾ ചിന്തിച്ചു പോകും. ക്ളീഷേകളുടെ മാലപ്പടക്കത്തിന് തിരി കൊളുത്തിയ മാതിരിയായിരുന്നു രണ്ടാംപകുതിയുടെ ഓട്ടം.മിക്ക സിനിമകളിലും കണ്ടു മടുത്ത സീനുകൾ കൊണ്ട് വിരസത പകർന്നു. ചിത്രത്തിൽ മികച്ചു നിന്ന ഒരു വിഭാഗം എന്ന്പറഞ്ഞാൽ, അത് ആക്ഷൻ ആണ്. ടോം ക്രൂസും കോബിയും മികച്ചു നിൽക്കുകയും. നല്ല high octane ആക്ഷൻ സീക്വേൻസും കാണാൻ കഴിയും.അത്യുജ്വല ആക്ഷൻ കൊറിയോ.. പക്ഷെ അത് മാത്രം പോരല്ലോ ഒരു ത്രില്ലർ സിനിമയ്ക്ക്.

മൊത്തത്തിൽ ഒരു disappointing ചിത്രം തന്നെയാണ് ജാക്ക് റീച്ചർ 2. ആദ്യ ഭാഗത്തിന് നല്ലൊരു പിന്തുടർച്ച അവകാശപ്പെടാൻ ഈ ചിത്രത്തിന്കഴിയുകയില്ല എന്നുറപ്പ്.

എന്റെ റേറ്റിംഗ് 5.3 ഓൺ 10

അറം പറ്റുക എന്ന് കേട്ടിട്ടുണ്ട്. ഒരു സിനിമയുടെ പേര് ഇങ്ങനെ അറം പറ്റുമെന്ന് ഒരിക്കലും വിചാരിച്ചില്ല.. 

198. Kashmora (2016)

കാഷ്‌മോര (2016)

Language : Tamil
Genre : Comedy | Drama | Fantasy
Director : Gokul
IMDB : 7.9

Kashmora Theatrical Trailer

സിനിമ ഇറങ്ങുന്നതിനു മുൻപ് തന്നെ പോസ്റ്ററിലും പിന്നീട് ട്രെയിലറും നമ്മളിലുളവാക്കിയ പ്രതീക്ഷ. കാർത്തിയുടെയും നയൻതാരയുടെ ലുക്കും ഒക്കെ നല്ല പ്രതികരണം നേടിയവയും ആണ്. അങ്ങിനെയാണ് രാത്രി 10:30ക്കുള്ള ഷോയ്ക്കു പോയത്. അത്യാവശ്യം നല്ല ആളുകളോട് കൂടി തന്നെ ചിത്രം തുടങ്ങി.

പ്രേതങ്ങളെ ഒഴിപ്പിക്കുന്നു എന്ന പേരിൽ നാട്ടുകാരെ മുഴുവൻ പറ്റിച്ചു നടക്കുന്ന കാഷ്‌മോറയും കുടുംബവും. അവരുടെ കൂടെ നിന്ന് പ്രേതത്തെ കാണാൻ കഴിയും എന്ന പ്രതീക്ഷയിൽ യാമിനി അവരുടെ കൂടെ ചേരുന്നു. എന്നാൽ ഒരു പ്രത്യേക ഉദ്യമം ഏറ്റെടുക്കുന്നതോടെ കാഷ്‌മോറയുടെയും കുടുംബത്തിന്റെയും ജീവിതം തന്നെ മാറി മറിയുന്നു. ശരിക്കും പറഞ്ഞാൽ കഥ ഒറ്റ വരിയിൽ എഴുതാൻ പറ്റില്ല. ഒരു മൾട്ടിലെയർ ശൈലിയായാണ് എനിക്ക് തോന്നിയത്. ഒരു കോംപ്ലക്സ് ലെയർ തോന്നി.

കാർത്തി, നയൻതാര രണ്ടു പേരും തങ്ങളുടെ റോളുകൾ അവിസ്മരണീയമാക്കും വിധം ചെയ്തു. മൂന്നു വ്യത്യസ്ത ഗെറ്റപ്പിൽ വരുന്ന കാർത്തി എല്ലാറ്റിനും തന്റെ കഴിവ് പ്രകടിപ്പിച്ചു. കോമഡിയും ഭീഭത്സവുമായ അവതരണം അനായാസമായി അവതരിപ്പിച്ചു. 
നയൻതാര ഒരു extended കാമിയോ ആയാണ് എനിക്ക് തോന്നിയത്. സ്‌ക്രീനിൽ ഉണ്ടായിരുന്ന സീനുകളിൽ എല്ലാം തന്റേതായ വ്യക്തി മുദ്ര പതിപ്പിച്ചു അവർ. പ്രായം കൂടുന്തോറും നയൻസിന്റെ തേജസും സൗന്ദര്യവും വർധിക്കുന്നത് പോലെയാണ് തോന്നിയത്.
ശ്രീദിവ്യ തന്റെ റോൾ തരക്കേടില്ലാതെ ചെയ്തു. 
ഒരിടവേളയ്ക്കു ശേഷമാണ് വിവേക് എന്ന നടൻറെ ഒരു ചിത്രം ഞാൻ കാണുന്നത്. വിവേക്, അക്ഷരാർത്ഥത്തിൽ മിന്നിച്ചു കളഞ്ഞു. കോമഡി ടൈമിംഗ് ഒക്കെ അസാധ്യം. ജാനകിരി മധുമിതയും കോമഡി നന്നായി കൈകാര്യം ചെയ്തു. പിന്നെയും കുറെ പേര് ഉണ്ടായിരുന്നു, പേരറിയാത്തതു കൊണ്ട് അവരെ പ്രതിപാദിച്ചു പറയുന്നില്ല. 

ഗ്രാഫിക്സ് നന്നായിരുന്നു. അത്ര മോശം എന്നൊന്നും പറയാൻ കഴിയില്ല.. പക്ഷെ അത് നന്നായിട്ടു ചെയ്തിട്ടുണ്ട്.

കഥയും കോമഡിയും അഭിനയവും ഗ്രാഫിക്‌സും ഒക്കെ നന്നായിരുന്നുവെങ്കിലും കാഷ്‌മോര എന്ന ചിത്രം പല കാര്യങ്ങളിലും വളരെയധികം പുറകിൽ തന്നെയാണ്. പ്രത്യേകിച്ച് എടുത്തു പറയുകയാണെങ്കിലും. സംവിധാനം, കാര്യങ്ങൾ അവതരിപ്പിച്ച രീതി ഒക്കെ മോശം തന്നെയായിരുന്നു. ഒരു ഹൊറർ മൂഡിൽ കൊണ്ട് വരുന്ന ഓപ്പണിങ് സീനുകൾ, വളരെ മികച്ച രീതിയിൽ തന്നെ ചെയ്തു, പക്ഷെ ഒരു പാട്ടോടു കൂടി കാര്യങ്ങൾ കൈവിട്ടു പോകുന്നു. സംവിധായകനും  ചിത്രസംയോജകനും ആണ് ഇതിന്റെ ഉത്തരവാദിയായി തോന്നിയത്. മോശം എഡിറ്റിങ് ചിത്രത്തിൻറെ ആഖ്യാനത്തിൽ വളരെ അധികം ഇടിവ് വരുത്തുന്നുണ്ട്. ഒരു racy narration വേണ്ട ഒരു ചിത്രത്തിന് ഇത്ര മോശം എഡിറ്റിങ്ങും സംവിധാനവും വളരെയധികം പിറകോട്ടടിക്കുന്നുണ്ട്.

സന്തോഷ് നാരായണന്റെ പാട്ടുകൾ വളരെയധികം മോശം ആയിരുന്നു. രണ്ടാം പകുതിയിൽ നയൻസിന്റെ ഒരു പാട്ടിൽ ശരിക്കും ഞാൻ ഉറങ്ങി പോവുകയും ചെയ്തു. പശ്ചാത്തല സംഗീതം ചില ഭാഗങ്ങളിൽ നന്നായിരുന്നുവെങ്കിലും മൊത്തത്തിൽ നിലവാരത്തിനും താഴെയായിരുന്നു. ഒരു നല്ല സൗണ്ട് ഡിസൈനറിന്റെ അഭാവം എടുത്തു കാണിക്കുന്നുണ്ട്.

കണ്ടിരിക്കാവുന്ന ആദ്യ പകുതിയും, വിരസത തരുന്ന രണ്ടാം പകുതിയും (ചില സമയത്തു സട കുടഞ്ഞെഴുന്നേൽക്കുന്നുണ്ടെങ്കിലും) ഈ ചിത്രം എനിക്ക് സമ്പൂർണ തൃപ്തി നൽകിയില്ല.. ഒരു തീയറ്റർ പോയി തന്നെ ഈ സിനിമ കാണണോ എന്ന് എന്നോട് ചോദിച്ചാൽ ഇല്ല എന്നാവും എന്റെ ഉത്തരം. പിന്നെ ഇതെല്ലാം വ്യക്തികളുടെ ഇച്ഛ അനുസരിച്ചിരിക്കുമല്ലോ.'

എന്റെ റേറ്റിങ് : 5.2 ഓൺ 10

സംവിധാനത്തിലും ഒക്കെ കുറച്ചു നല്ല രീതിയിൽ ശ്രദ്ധ കടത്തിയിരുന്നുവെങ്കിൽ ഒരു മികച്ച ചിത്രം ആയി മാറിയേനെ..

197. The Prey (La Proie) (2011)

ദി പ്രേ (ലാ പ്രോയി) (2011)

Language : French
Genre : Action | Crime | Thriller
Director : Eric Valette
IMDB : 6.7

The Prey Theatrical Trailer

ബാങ്ക് കൊള്ളയടിച്ചതിനു ആറു മാസത്തെ തടവിന് ശിക്ഷിച്ചതാണ് ഫ്രാൻക് അഡ്രിയാനെ. ഊമയായ കുഞ്ഞും  ഭാര്യയുമുള്ള ഫ്രാൻകിൻറെ രഹസ്യം ദുർബലനായ സെൽമേറ്റ് മോറിയേലിനോട് പറയുന്നു. ശിക്ഷ അനുഭവിക്കാതെ പുറത്തിറങ്ങുന്ന മോറിയേൽ ഒരു സീരിയൽ കില്ലർ ആണെന്നറിയുന്ന ഫ്രാൻക് ജയിൽ ചാടുന്നു. മോറിയേലിനെ അന്വേഷിച്ചു ഫ്രാൻകും, ഫ്രാൻകിനെ അന്വേഷിച്ചു പോലീസും. ഒരു ക്യാറ്റ് ആൻഡ് മൗസ് ജയിൻ ആണ് ഈ ത്രില്ലറിൽ പിന്നീട് കാണാൻ കഴിയുന്നത്.

ഫ്രാൻകിനു തന്റെ ഭാര്യയേയും കുഞ്ഞിനേയും രക്ഷിക്കാൻ കഴിയുമോ? പോലീസ് ഫ്രാൻകിനെ കുരുക്കിൽ വീഴ്ത്തുമോ?  മൗറിയേലിനെ തടയാൻ ഫ്രാൻകിനു കഴിയുമോ? എന്നുള്ള പ്രേക്ഷകരുടെ ചോദ്യങ്ങൾക്കുള്ള ഉത്തരം കൂടിയാണീ ആക്ഷൻ ത്രില്ലർ.

വൺ മിസ്ഡ് കോൾ സംവിധാനം ചെയ്ത എറിക് വാലറ്റ ആണീ ഫ്രഞ്ച് ചിത്രത്തിൻറെ സംവിധായകൻ. ആൽബർട്ട് ലുപോണ്ട്, ആലിസ് ടാഗ്ലിയോണി എന്നിവർ മുഖ്യ കഥാപാത്രങ്ങളെ അവതരിപ്പിച്ചു.  ആൽബർട്ട് എന്ന നടനെ പരമാവധി ചൂഷണം ചെയ്ത ഒരു ചിത്രം കൂടിയാണിത്. ഒരു വല്ലാത്ത സ്‌ക്രീൻ പ്രസൻസ് ആണ് അദ്ദേഹത്തിന്റെ.. അഭിനയത്തിലും മോശമല്ല. ആലീസ് ക്ലെയർ എന്ന പോലീസ് ഉദ്യോഗസ്ഥയെ അവതരിപ്പിച്ചു. സുന്ദരിയായ അവർ തന്മയത്വത്തോടെ തന്നെ തന്റെ റോൾ അവതരിപ്പിച്ചു. വില്ലനായി വന്ന ആളും മോശമാക്കിയില്ല.

എന്നെ ഏറ്റവും ആകർഷിച്ചത് ചിത്രത്തിൻറെ പശ്ചാത്തലസംഗീതം ആയിരുന്നു. മൂഡ് നിലനിർത്തി എന്ന് മാത്രമല്ല, ഉടനീളം കാണാൻ ഉള്ള ഒരു താല്പര്യവും എന്നിലുളവാക്കി, നല്ല ആക്ഷൻ സീകവൻസുകൾ ചിത്രത്തിന് മുതൽക്കൂട്ടായി.

കഥയെ പറ്റി പറയുകയാണെങ്കിൽ, ഒരു സാധാരണ പ്രതികാര ചിത്രം. പല ചിത്രങ്ങളിലും നമ്മൾ കണ്ടിട്ടുള്ള പ്രമേയം. ക്ളൈമാക്സ് ഒക്കെ നമുക്കൂഹിക്കാൻ കഴിയുമെങ്കിലും, ചില സീനുകൾ നമ്മൾ ഒട്ടും പ്രതീക്ഷിക്കാതെ കയറി വന്നു അത്ഭുതപ്പെടുത്തുകയും ചെയ്യും. കുറച്ചൊക്കെ ക്ളീഷേകളും ഉണ്ട്. എന്നിരുന്നാലും ചിത്രത്തിൻറെ പുരോഗതിയെ ഒരിക്കൽ പോലും പിന്നോട്ടടിക്കുന്നില്ല. തുടക്കത്തിൽ തന്നെ വില്ലൻ ആരെന്നു നമ്മെ മനസിലാക്കിപ്പിക്കുന്നുണ്ട് സംവിധായകൻ. നിരവധി ലൂപ്പ്ഹോൾസ് ചിത്രത്തിൽ ഉണ്ട്. അതൊക്കെ ആസ്വാദനതാളത്തിന്റെ ലെവൽ വെച്ച് നോക്കിയാൽ നിഷ്കരുണം തള്ളിക്കളയാവുന്നതു ആണ്.

ഒരു തവണ കണ്ടിരിക്കാവുന്ന ഒരു നല്ല ആക്ഷൻ ത്രില്ലർ.

എൻ്റെ റേറ്റിംഗ് 6.8 ഓൺ 10

സ്റ്റീവൻ സ്പീൽബെർഗ് ലിയാം നീസണെയും ജേസൺ സ്റ്റേതാമിനെയും വെച്ച് ഈ ചിത്രം ഹോളിവുഡിലേക്ക് റീമേക്ക് ചെയ്യുന്നു എന്നൊരു വാർത്ത കേട്ടിരുന്നു. പിന്നീടെന്തായോ എന്നറിയില്ല !!!!

മലയാളത്തിലേക്ക് മോഹൻലാലിനെ വെച്ച് വേണമെങ്കിൽ ശ്രമിക്കാവുന്ന ഒരു സ്ക്രിപ്ട് ആണ് ദി പ്രേ. ഭാവിയിൽ ഉണ്ടായിക്കൂടണം എന്നില്ലല്ലോ??

196. Jack Reacher (2012)

ജാക്ക് റീച്ചർ (2012)

Language : English

Genre : Action | Crime | Drama | Mystery | Thriller

Director : Christopher McQuarrie

IMDB : 7.0

Jack Reacher Theatrical Trailer

2012ൽ റിലീസ് ആയ ജാക്ക് റീച്ചർ എന്ന ചിത്രം കാണാൻ എന്നെ തീയേറ്ററിലേക്ക് ആനയിച്ചത് ഒരൊറ്റ പേര് മാത്രം ആയിരുന്നു. ഹോളിവുഡ് ചിത്രങ്ങൾ കാണാൻ തുടങ്ങിയ നാൾ മുതൽ മനസ്സിൽ കയറിയ ഒരു പേരായിരുന്നു  ടോം ക്രൂസ്. 

ഒരു സാധാരണ പട്ടണത്തിലെ ഒരു സുപ്രഭാതത്തിൽ അഞ്ചു പേർ വെടിയേറ്റ് വീഴുന്നു.  കുറ്റവാളിയായി ഒരു മുൻ മിലിട്ടറിക്കാരനെ അറസ്റ് ചെയ്യുന്നു. അദ്ദേഹത്തിന്റെ ആവശ്യം ജാക്ക് റീച്ചർ എന്ന മിലിട്ടറി അന്വേഷണോദ്യോഗസ്ഥനെ നിയോഗിക്കണം എന്നതായിരുന്നു. അദ്ദേഹത്തിൻറെ വക്കീലായ ഹെലനുമായി ചേർന്ന് ജാക്ക് നടത്തുന്ന അന്വേഷണം പല രഹസ്യങ്ങളുടെയും ചുരുളഴിയാൻ കാരണമാകുന്നു.

ചിത്രത്തിൻറെ ഏറ്റവും വലിയ മുതൽക്കൂട്ട് എന്താണെന്ന് വെച്ചാൽ,  വളരെ നല്ല കഥയും തിരക്കഥയും, കഥാപാത്രവികസനവും, ചടുലമായ ആക്ഷൻ സീനുകളും, വേഗതയാർന്ന ആഖ്യാനവുമാണ്. ജാക്ക് റീച്ചർ എന്ന സിനിമ ഒരു രീതിയിൽ പോലും സാധാരണ പ്രേക്ഷകനെ ബോറടിപ്പിക്കുന്നില്ല എന്നതാണ് വ്യത്യസ്തത. അതിനു നന്ദി പറയേണ്ടത് മികച്ച ചിത്രങ്ങളായ ദി യൂഷ്വൽ സസ്‌പെക്ട്സ്, എഡ്ജ് ഓഫ് ടുമോറോ,  വാൾക്കിരിയ്ക്കു വേണ്ടി ഒക്കെ തിരക്കഥ എഴുതിയ ക്രിസ്റ്റഫർ മക്വേറി എന്ന സംവിധായകനാണു. അദ്ദേഹത്തിൻറെ കഴിവ് എടുത്തു പറയേണ്ടത് തന്നെയാണ്. നല്ല സംഭാഷണ ശകലങ്ങളും പശ്ചാത്തല സംഗീതവും മൂഡ് നിലനിർത്തി. 

ടോം ക്രൂസ് ഷോ തന്നെയാണ് തുടക്കം മുതൽ അവസാനം വരെയും. ഹാർഡ്കോർ ആക്ഷനും അല്പം തമാശയും ഒക്കെ ഇടകലർത്തിയുമുള്ള അദ്ദേഹത്തിന്റെ അഭിനയം ചിത്രത്തിൻറെ മൈലേജ് വളരെയധികം നീട്ടി. ചിലപ്പോഴൊക്കെ ജെയിംസ് ബോണ്ടും ജോൺ മക്‌ലീനും (ഡൈ ഹാർഡ് നായകൻ) ഇടകലർന്ന ഒരു കഥാപാത്രമാണോ ജാക്ക് റീച്ചർ എന്ന് തോന്നാം.. അതിനു ജീവൻ നൽകിയ ടോം ക്രൂസ് ഒരു പ്രത്യേക പ്രശംസ അർഹിക്കുന്നു. റോസാമുണ്ട് പൈക് തന്റെ കഥാപാത്രം ഭംഗിയായി ചെയ്തു.റോബർട്ട് ഡ്യൂവൽ, ജയ് മക്കാർട്ടിനി, ഡേവിഡ് ഒയേലോവോ തുടങ്ങിയവരും തങ്ങളുടെ കഥാപാത്രങ്ങൾക്ക് ജീവൻ നൽകി. 

ഒരു ചടുലത നിറഞ്ഞ ഈ ആക്ഷൻ ചിത്രം ഒരിക്കലും നിരാശ സമ്മാനിക്കുകയില്ല. ഞാൻ പരമാവധി ആസ്വദിക്കുകയും ചെയ്തത് കൊണ്ട്ആ 8.6 ആണ് എന്റെ റേറ്റിങ്. 

ഇതിൽ കുറച്ചു ഗുണ്ടകളോട് ജാക്ക് പറയുന്ന ഡയലോഗ് മോഹൻലാൽ ചെപ്പു  പറയുന്നതുമായി സാമ്യം തോന്നി. ഇനി ക്രിസ്റ്റഫർ ചൂണ്ടിയത് വല്ലതുമാണോ??? പിന്നീട് ജാക്ക് റീച്ചറിലെ അതേ സംഭാഷണം വിജയ് കുറച്ചു റൗഡികളോട് തെറി എന്ന ചിത്രത്തിലും പറഞ്ഞിട്ടുണ്ട്.